RT-PCR bun dan ngaihtuahtute'n Sorkar aṭangin thu an la dawng lo
Gauhati High Court, Aizawl Bench thupek anga Mizoram sorkarin Lungleia RT-PCR bun dan tur ngaihtuah tura committee a dinte chuan an ṭhutkhawm hnuah Mizoram sorkar aṭangin thu dawn an la nei lo.
Health & Family Welfare principal director Dr F Lallianhlira kaihhruai committee hi August 13, 2021 khan Lungleiah an ṭhukhawm a; RT-PCR bunna atan Tourist Lodge, Lunglei Zotlang an endik hnuah laboratory din theih turah an ngai a, Mizoram sorkarah rawtna thlen an rél a ni.
Vanglaini thu dawn danin, ZMC-a mithiamte pawhin Tourist Lodge hnuai zawkah RT-PCR laboratory din theih turah an ngai a; chutih rualin, pindante chu chei ṭhat a ngai dawn a, engineer-te'n measurement an la nghal.
Committee-a Lunglei aiawha telte chuan, eng emaw avanga Tourist Lodge a remchang lo a nih chuan, Expert Team-te'n RT-PCR laboratory din theihna tura nikuma an lo ngaih tawh Lunglei Civil Hospital chung lama pindan ruak chu enfiah leh an rawt a ni.
Vanglaini palai zawhna chhangin committee member zinga mi YMA Sub-Hqrs., Lunglei president Lalrotluanga chuan, engineer-te'n estimate-te siamin, Tourist Lodge, Lungleia RT-PCR lab. din rawtna chu sorkarah thehluh tur a nih thu a sawi a, "Rawtna hi thehluh a ni daih tawh turah kan ngai. Sorkar aṭangin thu dawn kan la nei lo," a ti.
Tarlan tawh angin, committee hi August 9, 2021 khan din a ni a, din a nih aṭanga ni sarih chhungin Tourist Lodge, Lunglei leh in dang awm sa, RT-PCR laboratory din theihna tur enfiah tura tih an ni.
Hmun an enfiahnaa an hmuh dan leh rawtnate chu committee chuan Health & Family Welfare department-ah thlenin, a ṭul angin hmalak zui tura tih a ni.