ASF avangin inrawlh turin central ngen

Animal Husbandry & Veterinary (AH&Vety) minister Dr K Beichhua chuan nimin khan AH & Dairying secretary Atul Chaturvedi chu Delhi-a a pisaah a kâwm a, Mizoramah African Swine Fever (ASF) a lèn avangin central laipui inrawlh turin a ngen.

Dr K Beichhua chuan, ASF avangin hmarchhak state hrang hrangin harsat­na an tâwk mek tih sawiin, "Mizoramin kan tuar nasa ber. Sorkar laipui a rawn inrawlh thuai a pawimawh a, a nih loh chuan India ram pum tan harsatna lian zawk a thlen thei a ni," a ti a; ASF avangin Mizoramah vawk 40,000 vel a thih tawh thu a sawi.

ASF kai tawh, la damte pawh sorkar laipui policy anga suat (cull) a ṭul thu sawiin K Beichhua chuan, "Vawk suatna atana senso ngai zat chu cheng vbc. 58.20 a ni a, hemi aṭanga a zatve cheng vbc. 29.10 pawh state sorkar tan a harsa a ni," a ti a; kalphung pangngai lo deuhin sorkar laipui leh state sorkar tum tur 90:10 anga insiamrem a ṭul thu Atul Chaturvedi a hrilh.

AH&Vety Minister hian African Swine Fever chungchang bakah, Mizorama ran vulh tih­hmasawnna tura Vety department-in sorkar laipuia project an thehluh tawh, Department of Economic Affairs, Ministry of Finance-a la thang mek chungchang pawh Union Vety Secretary a sawipui a; sanction a nih ngei theih nan hma lakpui turin a ngen a ni.