Assam pan tur lirtheite endik a ni

Vairengtea Excise & Narcotics department enforcement staff-te chuan, August 23, 2021 tlai aṭang khan Assam lam pan tur lirtheite an endik. Hei hi ṭum danga an la tih ngai vak loh a ni.

Vanglaini thu dawn danin, Vairengte END enforcement-te hian Kolasib DC aṭanga thupek an hmuh bawhzuiin Mizoram aṭanga Assam pan tur lirtheite'n ruihhlo an phurh leh phurh loh uluk takin an endik a, endikna paltlangte chu clearance certificate an pe a ni. Nimin thleng khan Assam lam pan tur lirthei zingah ruihhlo phur man an la awm lo.

Tun hnaiah Assam police-te'n Lailapur-ah Mizoram aṭanga lut lirtheite chu an endik ṭhin a, Bilkhawthlira bus neitu chu ruihhlo a phur nia puhin August 17, 2021 khan an man a ni. He thil thleng chungchangah hian Bilkhawthlir Joint YMA chuan thuchhuah siamin, thil dik lo a awm ngei an rin thu an lo tarlang tawh a ni.

Hetih lai hian, Excise & Narcotics department mite chuan Covid-19 avanga hun eng emaw chen Assam aṭanga Mizorama lut lirtheite an endik loh hnuah August 23 aṭang vêk khan an endik ṭan a; zu eng emaw zat an man tawh laiin, ruihhlo dang man an la nei lo thung.