Sorkar a inbuatsaih ṭha tâwk lo - Duhoma

ZPM Legislature Party (ZLP) leader Lalduhoma chuan, Covid-19 hripui chungchanga Mizoram sorkar inbuatsaihna a ṭha tawk loa a ngaih thu leh tun hnaia hmanhmawh taka sorkar a chet a ṭul chhan chu sorkar inthlahdah vang a nih thu a sawi.

Lalduhoma hian nimin khan thuchah a tichhuak a; rálin min rawn bei dawn tih hriatna a rei tawh tih sawiin, "Kan inbuatsaihna erawh a dawráwm hle. Nikumah he hri hi China aṭangin a darh tih kan hre tawh a, kumin February-a session kan neih lai pawhin ram 26-ah, India telin a darh tawh tih kan hria; WHO pawhin health emergency a puang daih tawh. India sorkar pawhin state leh UT-te lo inbuatsaih turin a hriattir daih tawh a ni," a ti.

February 2020-a Assembly session-ah sorkar hotute lamin sum tamzia hlir an la tuipui nia sawiin Lalduhoma chuan, "Health Minister-in lo inrin lâwkna atana cheng nuai 132 a dil pawh February 25 khan Finance department-in an hnâwl a ni. PPE kit an lei a, file leh note sheet-a ziah awm miah loin, SPAB kaltlang loin, ṭawngkamin nuai tam tak man lei a ni a, invoice-a a lan dan leh RTI Act hmanga an pek chhuah a inmil lo hle. A hman tlak loh thu sorkar hotute ngeiin an sawi a, a kim lo nasa bawk,"a  ti a; chuti chung chuan action lak a ni lo tih a sawi.

ZLP Leader chuan, June 4-ah DMR aṭangin darkar 24 chhunga RNA extractor machine leina tur tifel turin Health Secretary hriattir a ni tih sawiin, "Khawlte hi kan mamawh dawn tih hi tun hnaia hriat chawp a ni lo. Hmanhmawh phelénga lei a ṭul chhan hi chu sorkar inthlahdah vang a ni tih phat thu a awm lo," a ti a; RT-PCR khawl lei belh vat turin sorkar a phût.

Sorkar thutlukna a mumal lo ṭhin tih sawiin Lalduhoma chuan, "Curfew hlih order an siam chu sawiselna a nasat avangin a zan là lâah an sût. Cabinet-in an rêl HSLC exam hun tur an puan pawh a zanah sût leh a ni bawk. Vairengte checkgate-ah permit a ngai, a ngai leh lo, a ngai leh tih velte khan mipui min tichiai hle. Thingtlang huap vekin motor intlan chhâwktir a ni a, a hnuah sût leh a ni. Hengte hian ngun takin thil an ngaihtuah lohzia a tichiang," a ti.

ZLP leader Lalduhoma chuan, "Hun harsa kan tâwk a, hotute tan rorel fel sen a ni lo tih kan pawm. Rilru thianghlim, bonafide-a rèl a nih chuan a fuh loh deuh pawhin kan hrethiam khawp mai. Mahse, ramin sum harsatna a tawh lai leh Central pawhin scheme zawng zawng a tihtawp vek laia PWD hnuaia JE 40 lai lak tum thâwmte hi palzam mai chi a ni lo," a ti a; MLA-te an fund aṭanga nuai 50 ṭheuh thawh tura beisei a nih laia nuai 37 chauh pek an ni rih si chu mak tih loh chi a ni lo tih a sawi.

Ramin harsatna lian tak a tawh mek laia June 3, 2020-a Horticulture department-in short tender chhuah a, mau chi - Brandisii leh Latiforus supply-tu tur tender a chhuah a, ni 12 chauh chhànna hun hawn a nih chungchangah Duhoma chuan, "Mau/ruate hi khawiah nge an chìn, tu chìn nge tihte tlang hriat a ni. Tun ang huna hetiang hruaitu kan nei hi a vanduaithlak tak zet," a ti.

Lalduhoma chuan, state dangten duty laia thite chhawmdawlna ṭha tak an siam laiin, Mizoram sorkarin sorkar hnathawk tan chauh insurance a siam thu te, ramri duty-naa chesual Lalpianvula, Zawlnuam Bawrai, damdawi-ina enkawl mek hnena Rs. 10,000 pek chu 'Saṭah chhuak pek an tih ang' a nih thu te, duty tur inhmuh a har tual tual a, CM Relief Fund-a sum thawhtu an tlem tial tial thu te, Covid-19 kaite chu Mizoram páwn aṭanga rawn lutte vek an nih laia sorkarin ILP pek theihna order a siam thute a sawi bawk.

ZLP Leader chuan, quarantine-a awm mekte endik vek theih a nih chuan Mizoram chu a la invèn theih a rin thu sawiin, "Hei hi kan tih chuan nunphung pangngaiin thui tak kan la nung thei a ni," a ti a; lockdown chungchanga khauh (strict) lutuk chu ramin a chhiatpui zawk theih thu sawiin, "Eizawnna ti thei lo léka kan inhrêk phei chuan kan la inchhir viau thei," a ti.