Aizawl páwnah September laihâwl aṭangin regular class kalpui beisei

Higher & Technical Education (HTE) minister Dr R Lalthangliana kaihhruaiin nimin khan a pisaah sorkar hotute'n Mizorama college leh zirna-in sang zawkte hawn dan tur an sawiho a; kumin September thla laihâwl vel aṭangin Aizawl páwn lamah regular class kalpui a nih theih nan zirna-in hawng turin ruahmanna siam an rel.

Dr R Lalthangliana chuan, Covid-19 léng avangin hun rei tak regular class neih a nih tawh loh thu sawiin, "Heti chung hian zirlaite an khaihlak loh nan ruahmanna hrang hrang siam a ni a, online class leh thil chi hrang hrang kalpuiin, degree course examination pawh hlawhtling taka buatsaih a ni. India rama university leh college tam zawkin an tih theih loh kan ti hi zirlaite hmakhaw ngai tak chunga thawktute inpekna vang a ni," a ti a; Covid-19 léng dinhmun thlir chungin regular class kalpui dan tur ngaihtuah a ṭul thu a sawi.

Ṭhutkhawmah hian India ram state hrang hranga college leh university dangte kal dan thlirho a ni a; Mizoramah pawh college leh zirna-in ṭhenkhat hmunhmate CCC atana hman a la nih thute tarlan a ni.

Meeting chuan, September thla laihâwl vel aṭangin Aizawl páwn lamah regular class kalpui tur ngaihtuah a, zirna-in hawng tura ruahmanna siam ṭha an ti a; State Disaster Management Authority hnuaia State Executive Committee-ah thlen ni se an tih bakah, hripui léng dinhmun thlir chungin a ṭul anga ngaihtuah ṭhat leh turin an ti.

Mizoram University hotute chuan, class ṭan chungchangah Mizoram sorkar thupek ang an zawm theih tur thu an sawi.

Ṭhutkhawmah hian HTE secretary Esther Lalruatkimi, additional secretary Lalrinsanga leh director Nazuk Kumar bakah, Mizoram University hotu te, College Principal’s Council hruaitute leh HTE department hotute an tel a ni.