KHAWTHLIR

No drone zone
Mamit DC Dr Lalrozama chuan August 24, Thawhlehni khan Mizoram leh Assam inrina bul hnaia awm Chuhvel, Saikhawthlir, Hriphaw, Thinghlun, Kanhmun leh Bajirungpa khuate leh, Assam ramria awm khuate chu drone hman phal lohna hmun (no drone zone)-ah a puang. Heng hmuna mimal, sorkar leh military drone hmang turte chuan Mamit DC hnenah phalna lak hmasak tur a ni a; phalna nei loa drone hmangte chu tihchhiatsak an nih dawn thu tarlan a ni.

MLA-in hmanrua pe
Lunglei High Powered Committee vice chairman Lawmawma Tochhawng, MLA chuan nimin khan Serkawna Baptist Church of Mizoram-in Covid-19 veite enkawlna an buatsaih, Baptist Covid Care Centre (BCCC) a tlawh a, Covid-19 hri dona hmanrua a pe. BCCC hi July 28, 2021-ah kalpui ṭan a ni a, July 30 aṭangin Covid-19 veite enkawl ṭan a ni.

ASF endik rûnpui
Siaha district-a Thiahra khuaah August 24, Thawhlehni khan African Swine Fever (ASF) endik runpui neih a ni a, ASF vei vawk 52 hmuh a ni. Siaha district veterinary officer leh Thiahra khawtlang hruaitute hmalaknain ASF vei vawk 52-te chu suat (culled) nghal a ni.

DTO pisa hawng
Siahaa District Transport Officer pisa thar chu August 24, Thawhlehni tlai khan Transport minister TJ Lalnuntluanga'n a hawng a, thawktute chu hawihhâwm taka anmahni pantute chhàwn turin a chah. Siaha DTO pisa thar hi NEDP hnuaiah cheng nuai 210.33 sénga sak a ni a, September 27, 2016-ah sak ṭan niin, July 20, 2020-ah sak zawh a ni.

Lawmpuina hlân
Primary school category-a Mizoram State Teachers Award, 2021 dawngtu Vanlalthangi Chhakchhuak, Lunglei Electric Veng Primary School-II headmistress chu nimin khan Lungleia Economics & Statistics department chuan lawmpuina thuchei leh pawisa an hlân. Vanlalthangi Chhakchhuak hian online class atan youtube channel a siam a, sap ṭawnga video awmte chu naupangte'n an hriatthiam theih turin Mizo ṭawngin a siam a ni.