Aizawlah mi 100-in PPE 5,000 an ṭhui mek

'Scheme for Support of Local Artisans who lost their sources of livelihood due to COVID-19 pande­mic/ lockdown' hnuaia Commerce & Industries department-in Aizawla puanṭhui thiamte perso­nal protective equipment (PPE) a ṭhuitir chu a thawh khatna kalpui mek zel a ni a; tun dinhmunah mi 100 in PPE 5,000 an ṭhui mek.

Commerce & Indus­tries department hotute chuan Vanglaini palai zawhna chhangin, PPE ṭhui thawh khatna chu August 28, Inrinni khian zawh hman a nih an beisei thu an sawi a, "A thawh khatnaah hian Aizawla puanṭhui thiam, local task force-in an thlan mi 400-te'n PPE 21,600 an ṭhui dawn a, Health department hnenah 16,600 kan hlan tawh," an ti a, tunah hian an ṭhui zawh sa 1,900 vel an lak khawm leh tawh thu an sawi.

PPE ṭhui thawh hnihnaah 14,400 ṭhui tum a nih thu sawiin CI department hotute chuan, "PPE hi a vaiin 36,000 ṭhui tur a ni a, sum senso tur zat chu cheng nuai 233.98 a ni. Disaster Management & Rahabilitation (DMR) department aṭangin a thawh khatna senso atan cheng nuai 140.38 kan hmu tawh a, a thawh hnihnaa mi tur erawh kan la dawng rih lo," an ti a; a thawh hnihnaa puanṭhuitu tur zat an la hriat theih rih loh thu an sawi.

PPE hi a thawh khatnaah Aizawla puanṭhui thiam mi 300-in 15,000 an ṭhui zo tawh a; puan ṭhuitute entawn tur PPE 300 leh mamawh hmasa zualpui phuhrûk nan Mizo ṭhui tho PPE 1,300 lei niin, hengte hi Health department hnenah an hlan tawh a ni. A thawh khatnaah tho mi 100-in PPE 5,000 an ṭhui leh mek bakah, a thawh hnihnaah 14,400 ṭhui tum a ni.

Tarlan tawh angin, State Disaster Management Authority hnuaia State Executive Committee chuan Covid-19 vanga harsatna thleng mekah puanṭhuia eizawng, hna thawh tur nei lote'n thawh tur an neih theih nan tualchhunga ṭhui PPE hman ṭha an ti a, chumi bawhzui tur chuan Commerce & Industries department ruat a ni.
Commerce & Industries department chuan Aizawla veng hrang hranga LTF-te hnenah an huam chhunga inkhàrkhip avanga an eizawnna chhunzawm thei lo puan ṭhui thiam zawng chhuak tura ngenna a thawn a; PPE ṭhui thawh khatnaa PPE ṭhuitute chu Aizawla veng 60-a mi 400 an ni.

Commerce & Industries hotute chuan, PPE 36,000 ṭhui tur thlannaah hian Aizawla veng 83 chu tuam chhuah vek an tum thu an sawi a; Health department hnenah PPE 16,600 leh hmai khuhna (face shield) 7,500 pek a ni tawh tih an sawi bawk.