Dy CM-in 100 Days Campaign a hawng

Deputy chief minister Tawnluia chuan nimin khan Swachh Bharat Mission (Gramin) Phase-II hmalakna, 100 Days Campaign (Sustainability of ODF gains and achieving million soakpits) a hawng a; kum 2020-21 chhunga PHE department hnathawh tarlanna Jal Jeevan Mission Mizoram Yearbook a tlangzarh bawk.

Tawnluia chuan, kum 2014-a Swachh Bharat Mission kalpui a nih aṭangin faina leh thianghlimna kawngah hmuh theihin India ram leh Mizoramin hma a sawn tih a sawi a, "Tunah chuan India ram pumpui chu open defaction free (ODF) niin, páwn lêra inthiar awm lohna ram tia chhàl theih a lo ni ta. Swachh Bharat hmalakna hi a bik takin thingtlanga cheng, mi rethei zawkte'n an chhawr ṭangkai hle a ni," a ti a; ni 100 campaign chu district tinah kalpui tur a nih thu a sawi.

100 Days Campaign chhung hian tuichhe sâwngbâwlna leh tihrîralna (soakpit) a tam thei ang ber siam te, êk-in chhia leh thawm ṭhat ngaite ngai pawimawh tura inzirtirna beihpui thlak te, in sa thar leh in dang tharte mahni puala ek-in nei ngei tura inzirtirna beihpui thlak te, khaw tinah Gram Sabha neiha faina leh thianghlimna lama khaw dinhmun enfiah leh hmalak dan ṭha zawk sawihonate buatsaih tum a ni.