Mamit district dinhmun sawiho a ni

Mamit DC Dr Lalro­zama hoin nimin khan Mamit khawpuia páwl hrang hrang hruaitute leh sorkar hotute'n Mamit district-a hmasawnna hna kal mek, hmachhawp leh district dinhmunte an sawiho.

Dr Lalrozama chuan, Bru lâk lêt tawh­te chhawmdawlna chung­chang sawiin, "8th batch-ah chhungkaw 14 hruai kîr niin, package zawng zawng pek kim vek tawh a ni a, chhungkaw 14 zingah normal ration card nei chhungkaw panga an awm tawh a, chhungkaw pakua tan hmalak mek a ni bawk," a ti a; fixed deposit-a sum dah pawh September 2021-ah lak chhuah theih a nih dawn thu a sawi.

Bru lak lêt batch 9-naah chhungkaw 199 hruai kîr an nih thu sawiin Bawrhsap chuan, "An zinga chhungkaw 131-te hi October 30, 2021 thleng package la pek tur an a, chhungkaw 68-te chu November 30, 2021 thleng package pek tur an ni," a ti a; ramri chungchanga sorkar hmalakna hrang hrang a sawi bawk.

Bru hruai kîrte chu ṭanpuina Rs. 4,00,000, in sak ṭanpuia Rs. 1,50,000, kum hnih chhung thla tin Rs. 5,000 leh a thlâwnin ration pek a ni.

Ṭhutkhawma tarlan danin, Mamit district chu Aspirational District a nih angin khaw 11-ah anganwadi sak a ni a, mobile clinic atan ambulance pathum leh mobile pick-up lei a ni. Mamit District Hospital-a nau neihna hmanraw hrang hrang lei nan cheng nuai 17.2 hman a ni a, khaw ṭhenkhatah mobile laboratory hmanrua pek a ni bawk.

Aspirational District programme kalpui mekah hmasawnna kawnga khaw hnufual bik (low performing village) khaw 23 thlan a ni a, chu'ng khuate tan chuan North Eastern Council hnuaiah cheng nuai 100 hmangin project kalpui tur a ni.

Mamit SP pawhin ramri veng tura police duty dan tlangpui a sawi a; ramri venhimna kawngah leh a rûka ruihhlo tawlh donaah mipuite chu thawhpuiah a sáwm a ni.