Lawngtlaia CCCC-te tlawh

Lawngtlai District Level Task Force on Covid-19-in a lo rel tawh angin nimin khan addl. DC Marilyn Rualzakhumthangi hoin official-te'n Lawngtlai khawpui chhunga Community Covid Care Centre (CCCC) ruahman sa hrang hrang tlawhin, a dang ruahman belh theih dan tur an thlirho nghal.

Tun dinhmunah Lawngtlai khawpui chhunga veng pali - Chawnhu, College Veng, Lawngtlai Vengpui leh AOC Veng te'n CCCC ruahman sa an nei tawh. Lawngtlai khawpuiah Covid-19 positive zatin kiam lam a pan hleih theih loh avang leh Covid Care Centre (CCC) awm sain a zo lo lam a nih tawh avangin, CCCC mamawhna hi a sang tawh hle nia tarlan a ni.