COVID-19: Mizoram dinhmun : Hripui vei 740 hmuh belh a ni

August 24, Thawhlehni khan Mizoramah swab sample 9,636 endik aṭangin Covid-19 vei mi 740 (7.68%) hmuh chhuah a ni. Nimin khan hripui vei dam tawh mi 281 chhuahtir an ni a, hripui vanga thi an awm lo.

Covid-19 vei hmuh tharte chu ZMC labora­tory-a hmuh chhuah 140, TrueNAT hmanga hmuh 31, Rapid Antigen Test hmanga hmuh 565 leh Fluorescent Immuno­assay (FIA) hmanga hmuh pali an ni a; mipa 346 leh hmeichhia 394 an ni.

Hripui vei hmuh thar 740-te chu symptom nei 360 leh nei lo 380 an ni a; tualchhunga kái 736 leh tun hnaia state pawn aṭanga rawn lut pali niin, tualchhunga kái zingah kàina chin hriat loh mi 367 an awm.

IDSP record angin, Mizoramah Covid-19 vei 54,057 hmuh chhuah a ni tawh a, mipa 27,832 leh hmeichhia 26,225 an ni. Nimin tlai dar 5 thleng khan mi 47,473 (87.82%) chhuahtir an ni tawh a, mi 201 (0.37%) thi tawhin, enkawl mek mi 6,383 (11.81%) an awm. August 24, Thawh­lehnia sample endik dan chu - ZMC laboratory-ah Aizawl leh Serchhip district-a mi 1,224, TrueNAT hmangin district 10-ah 249 leh RAT hmangin district 11-ah 8,128 a ni a, a vaiin sample 9,636 a ni. Sample endik aṭanga hripui vei hmuh chhuah 740 chu 7.68% a ni a; ZMC-ah 11.44%, TrueNAT-ah 12.45%, RAT-ah 6.95% leh FIA-ah 11.43% a ni.

Thawhlehnia district hrang hranga hripui vei hmuh chhuah dan chu - Aizawlah mi 447, Kolasib-ah 114, Lawngtlaiah 61, Siahaah 40, Lungleiah 28, Mamitah 24, Champhaiah 13, Hnahthialah pakua leh Serchhipah mi pali a ni a; Aizawla veng 62 leh khua/hmun dang 50-a mite an ni. Lunglei leh Kolasib khawpuiah veng 10 ve ve a lang a, Lawngtlaia veng pasarih, Siahaa veng paruk leh Champhaia veng pali an lang bawk.

Hripui vei hmuh chhuah thar mi 740 zingah naupang kum tling lo 230 vel awmin, an zingah symptom nei 100 chuang an tel a, nausen kum khat tling lo pali an awm. Kum 60 chung lam mi 60 vel awmin, symtom nei 20 chuang an awm a, hripui vei hmuh zinga upa ber pahnih, kum 90 mite pawh symtom nei an ni. August thlaa ni 24 chhungin Mizoramah Covid-19 vei mi 15,133 hmuh chhuah a ni tawh a, chawhrualin ni tin mi 630.54 hmuh chhuah an awm ang a ni. Mizorama Covid-19 vei hmuh tawh zat 54,057 chu kum 2011 chhiarpui angin, Mizorama mi 1,000 zelah hripui vei mi 49 an awm ang a ni.

Nimin khan tlai dar 5 thlengin hripui laka fihlim tawh mi 281 chhuahtir an ni a; Aizawl district-ah mi 112, Kolasib district-ah 105, Siaha district-ah 20, Mamit district-ah 19, Hnahthial district-ah 10, Serchhip district-ah pariat, Lawngtlai district-ah pali leh Champhai district-ah mi pathum an chhuak. Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 12,752 hmuh chhuah a ni tawh a, TrueNAT-PCR hmangin 3,122, RAT hmangin 38,139, FIA hmangin 43 leh Guwahati-ah pakhat hmuh chhuah a ni tawh.

IDSP tarlan danin, August 24, 2021 thlengin Mizoramah swab sample 8,10,946 endik a ni tawh a, chu'ng aṭanga Covid-19 vei hmuh tawh zat 54,057 chu 6.67% a ni. Hripui vei hmuh tawh zinga mi 49,755 chu Mizoram chhunga kái chhâwng an ni a, mi 4,302 chu Mizoram páwn aṭanga an rawn luh hnua hmuh chhuah an ni.