Oil palm kalpui lo turin sorkar ngen

Association for Enviro­n­mental Preservation (ASEP) chuan thuchhuah siamin, oil palm-in leilung leh environment a tihchhiat nasat ṭhin avangin Mizoramah kalpui tawh loh ni se an duh thu an tarlang a; kalpui tawh lo turin Mizoram sorkar an ngen.

ASEP chuan, oil palm chu thil dang nena chìn pawlh theih loh, amaha chìn (monoculture) ngai a nih thu sawiin, "Kan thlai dangte tan chuan hmelma leh biodiversity tan nghawng ṭha lo thlen thei a ni a, tui a heh avangin tuihna tikiamtu a ni thei bawk. Climate change leh global warming tizualtu a nih theih bawk avangin kan ramah chuan kalpui tawh loh kan duh. Nasa taka lo kalpui tawh ram tam tak pawhin an tàwpsan mek a nih laia kan ram zím têa lo tharthawh leh hi thil tih chi-ah kan ngai lo," an ti.