ZPM ṭhalaite'n duhsakna hlân

ZPM Ṭhalai chuan thuchhuah siamin, ZPM Val Upa Council-in ZPM working president atan K Sapdanga an ruat chu an lawmpui thu an tarlang a; ZPM tihchakna leh ram siamṭhat hna nasa zawka a thawhna turah duhsakna an hlan.

ZPM ṭhalaite chuan, an party-in hruaitu duhawm tak tak, ram siamṭha tura theihtawp chhuah ṭhin a nei chu Mizoramin an zár an zo chho zel nia sawiin, "Kum 2023 inthlanpui lo awm turah Pathian leh Zoram mipui zarah kalphung thar, mipui sorkar siam turin ZPM-in chakna a chan ngei kan beisei a ni," an ti.

ZPM party-in Val Upa Council (VUC) a nei chu ZPM leh ram tan vanneihthlak an tih thu sawiin ZPM Ṭhalai chuan, "Party ṭhenkhatin mipui rilru chawk buai turin ZPM VUC hi sawi hnâwm tum ṭhin mah se, VUC member, mi thiam tak takte'n kal sual theihna laka ZPM min venpuina leh ram hmasawnna tura an thiamna hlu tak an sênnate mipuiin a zar kan zo chho deuh deuh dawn a ni," an ti a; MNF party pawhin VUC ang nei se, hripui vanga chhuanchham tam tak an awm laia airport cute buaipui te, mau/rua buaipui vak te, hripui do nana phûl lem phah leh tih theih loh tur tiam vak vakte chu a thlen an rin loh thu an sawi bawk.