Central scheme hnuaia hnathawhte thlirho

Lok Sabha MP C Lalrosanga kaihhruaiin nimin khan Kolasib District Development Coordination & Moni­toring Committee (DISHA) chuan sorkar laipui programme hrang hrang hnuaia hnathawhte an thlir lêt.

C Lalrosanga chuan, Kolasib district-a khaw hrang hrangah hma­sawnna khairual a awm ngei a beisei thu sawiin, "DISHA hi sorkar laipui scheme leh programme kalpui tawh hlawhtlingte hlawhtlin chhan leh hlawhtling lote harsatna bihchian a, hma thar lak dan tur ruahmanna siamhona hun ṭangkai tak a nih ka beisei," a ti.

Lok Sabha MP chuan, ramri hrûla awm khuate tihhmasawn chu Kolasib district-a department hrang hrang hotute kutah thui tak a innghah thu a sawi a; PMGSY hnuaia hmalakna ṭhenkhat thawh zawh hun bituk chhunga zawh hman loh tam tak awm chu sorkar laipui ngaimawh a tlin thu a sawi bawk.

Ṭhutkhawmah hian district office 12 aṭangin kum 2020-21 chhunga hna an thawh dan thlirlet a ni. Tarlan danin, Kolasib district-ah MGNREGS hnuaia inziak lut mi 19,697 hnenah kum 2020-21 chhung atan ni 100 inhlawhna pek a ni a, hna 1,567 zawh a ni tawh.

DRDA leh department hrang hrang thawhhona hnuaiah kuthnathawktute, ran vulhtute leh loneitute tihhmasawn hna kalpui ṭhin a ni a, eizawnna kawnga hmeichhiate tihhmasawn nan Thingdawl RD Block-ah self help group (SHG) 40 leh Bilkhawthlir RD Block-ah SHG 55 din thar a ni.

PWD Kolasib Division hnuaia PMGSY kaltlanga kawng siam ṭhenkhat, hunbi tuk chhunga zo hman lote endik dan tur leh hma lak chhunzawm dan tur te, PHE department hnuaia khaw hrang hranga hmalakna kalpui dante thlirho a ni a; Health department hnuaia hmalaknate thlirho a ni bawk.

Ṭhutkhawmah hian Serlui bialtu MLA Lalrinsanga Ralte, Kolasib DC Dr H Lalthlangliana leh Kolasib district-a sorkar laipui ruahmanna a hmasawnna hna kalpuitu department pakua hotute an tel a ni.