RT-PCR 2 hmang ṭan

Health secretary H Lalengmawia chuan nimina Chief Minister hoa inràwnkhawmnaah, Zoram Medical College (ZMC)-a Covid-19 Laboratory-ah nimin aṭang khan Department of Biotechnology hnuaia Institute of Bioresources and Sustainable Development (IBSD) aṭanga RT-PCR kháwl dawn chu nimin khan hman ṭan a nih thu a sawi.

H Lalengmawia chuan, Hauva & Sons, Zawlbuk Tuizém neituin sum a thawh hmangin RT-CPR khawl chah belh mek a nih thu sawiin, "Kan khawl chah hi a rawn thlen thuai beisei a ni. Hei bakah hian NHM aṭangin chah mek a ni bawk. DMR Minister remtihna angin SDRF sum hmangin RT-PCR tichaktu lei a ni dawn," a ti.

Health Secretary sawi danin, Forensic Science Laboratory-in RT-PCR tichaktu hmanrua an nei a, chu chu ZMC-ah hman a ni dawn. Hman theih hunah chuan RT-PCR dang thleng lo rih mah se, pahnih awm mek hmangin ni khatah swab sample 1,000 chuang endik theih beisei a ni.

Quarantine facility-a awm mekte'n an chhuah hmaa an swab sample test result an hriat theihna atan leh phai aṭanga rawn haw quarantine facility aṭanga chhuak tawhte pawh an sample test turin department chuan hma a la mek a ni.