Independent MLA-te Zo Peoples Movement Legislature Party hming put phalsak an ni

6th February, 2020

Kum 2018 Assembly inthlanpuia Zoram Peoples' Movement (ZPM)-in independent candidate an siam zinga Mizoram Legislative Assembly member (MLA)-te chu Assembly Speaker chuan 'Zo Peoples Movement' Legislature Party Group anga an awm a phalsak.

Zo Peoples Movement (ZPM) Legislature Party (ZLP) anga independent MLA-te awm phalsak chungchangah hian Assembly secretary SR Zokhuma chuan nimin khan Lalduhoma, MLA hnenah hriattirna a thawn a, "Zoram Peoples Movement Legislature Party aiah 'Zo Peoples Movement Legislature Party' tia thlak i rawn dilna chu phalsak i ni tih ka han hriattir a che," tih a ni.

Assembly inthlanpuia ZPM candidate thlan tlinte chu an dinna pawl (ZPM) Election Commission of India (ECI) hriatpui political party a nih loh avangin independent candidate an ni a, an tlin hnuah pawh independent MLA niin, Assembly Speaker phalna angin ZPM Legislature Party an din a, eptu lamah MLA ngah ber an nih avangin an leader Lalduhoma'n opposition group leader dinhmun a chang.

ZPM chu nikum khan ECI pawmpuina a hmuh tâk avangin, independent MLA-te chu ZPM Legislature Party anga an awm reng a rem tawh lo tih, September 18, 2019 khan Assembly speaker Lalrinliana Sailo chuan a hriattir a ni.

ZPM Legislature Party leader Lalduhoma chuan, an hming chu Assembly-ah hman zui rem lo mah se, khin zui an tum lo a, hming hran an invuah mai tur thu leh, ZPM MLA pasarihte chu an inhlâwm khawm tlat dawn thu a lo sawi tawh a; ZPM MLA-te chuan anmahni thlangtu mipui an phatsan (defect) loh thu a sawi tawh ṭhin bawk.

Kum 2018 Mizoram inthlanpuia Zoram Peoples' Movement (ZPM) candidate thlan tlinte chuan Assembly House-ah ZPM ni lo hming dang invuahin legislature party an din. Assembly speaker Lalrinliana Sailo pawhin hming dang an invuah a nih chuan legislature party anga hlâwm khata an awm a rem lohna tur a awm loh thu a sawi.

ZPM candidate independent MLA-te chuan ZPM Legislature Party tih hming put zel an duh avangin nikum October thla vel aṭangin legislature party hming tur an ngaihtuah tawh. An secretary ṭhin Dr Vanlalthlana chuan, ZLP (ZPM Legislature Party) hming an put chhunzawm theih nan 'Zoram' tih aiah 'Zo' tih hman a, Zo Peoples' Movement Legislature Party tih invuah an tum thu a lo sawi tawh a ni.