Sorkarin Lalremsiami a chawimawi : Aizawlah hockey ground pakhat aia tam Neih tumin sorkarin hma a la dawn - CM

Mizoram sorkar chuan nimin khan Tokyo Olympic 2020-a India hmeichhe hockey team-a tel Lalremsiami, Kolasib chawimawina hun Vanapa Hall-ah a buatsaih. Khuallian chief minister Zoramthanga chuan, Aizawlah hockey khelmual pakhat aia tam neih tumin sorkarin hma a lak dawn thu a sawi.

Chief Minister chuan, Olympian ni thei Lalremsiami Mizoramin a nei chu ropui a tih thu sawiin, "Sorkarin cheng nuai 25 pek ni se a ti a, a bul ṭanna atan cheng nuai 10 pek a ni a, vawiinah cheng nuai 15 pek leh a ni. Covid-19 avangin sum leh páiah duh angin kan chak lo a, kan tih theih tâwk hi min hriatthiam a ngai a ni," a ti.

Hockey chu Mizoramah a thi tawh hle tih sawiin Zoramthanga chuan, "Remsiami hmingṭhatna leh chawimawina dawn hian a tihnun leh ngei ka ring. Hockey-ah hian kan ṭha em em ṭhin a ni," a ti a, hockey khelmual ṭha nei loin rei tak Mizoram a awm thu a sawi.

CM Zoramthanga chuan, khelmual atana siam theihte chu football atan veng leh a awmna area-te'n an duh zel tih sawiin, "Tunah chuan mi thinlungah hockey field siam duhna a awm tawhin ka ring. Aizawlah pakhat mai ni lo, pahnih emaw, a aia tam neih tumin sorkarin hma a la dawn a ni," a ti.

Khualzahawm Tawnluia, deputy chief minister chuan, Lalremsiami chu sorkarin a tih theih chin tâwkah duhsakna a pek thu sawiin, "Hnûhma ropui tak a lo neih tawh bakah, Tokyo Olympic-ah a chêt ṭhat em avangin Mizoramin a pual liau liauin post a siamsak a ni," a ti a; Lalremsiami tana sorkar hna an siam thar chu mi dangin an luah thei lo tih a sawi.

Tawnluia chuan, infiammite hmasawn zelna atan leh chawhphurna atan state, national leh international level-a che ṭhate tan sorkarin ruahmanna a siam ṭhin thu a sawi a, "Anni ho tan hian kan sorkar chuan sorkar hnaah 5% a hauh (reserve) a ni. Sorkar kal tawhte pawhin achievement nei ṭha chu chawimawina leh duhsakna an hlan ṭhin a, chhunzawm zel ila a ṭha," a ti.

Lalremsiami chuan, infiammi tan ruih theih thil leh zûk leh hmuam tih loh tawp a ṭhat thu sawiin, "Infiammi zûk leh hmuam ti ka hmuh hian mak ka ti ṭhin. Tum an neih chuan engtin nge an tih theih zawk ka ti," a ti a; ruihhlo leh zûk leh hmuamte'n taksa an tihchak loh ṭhin thu a sawi.

Chawimawina inkhawmah hian Lalrem­siami hnenah Chief Minister-in Mizoram sorkarin pawisa a pek hmabak Rs. 15,00,000 leh Delhi-a Chief Minister ṭhianpain a leisak scooty a hlan a; Deputy Chief Minister-in hockey chief coach appointment order a hlan bakah, Soil & Water Conservation minister R Lalzirliana'n Kolasib-a an department ram in hmun atana an pekna a hlân a ni.