MP-in ramri hnaih khua a tlawh

Lok Sabha MP C Lalrosanga chuan nimin khan July 26, 2021-a Vairengte dáia Mizoram police-te leh Assam police-te inkahna hmun leh Saihapui-V khua a tlawh a; ramri chinfelna tura sorkar hmalak mekna lawmawm a tih thu leh chak zawka hma lak zel a nih a rin thu a sawi.

C Lalrosanga chuan, Mizoram police-te leh Assam police-te inkah hun lai chu Parliament session neih lai a nih thu sawiin, "Ramri hi muanawm taka chinfel thuai a ṭul a, kei pawhin ramri chungchang hi sorkar laipuiah ka lo thlen ve tawh ṭhin a ni," a ti.

Ramri venhimna kawnga a bul hnaia mipui inpekna chu theihnghilh a ni tawh dawn lo tih sawiin Lok Sabha MP chuan, "Ramri depa awm Vairengte leh khaw hrang hrang mipui an fakawm a, ram chhan nana an inpekna, huaisenna leh an tha thawh dan zawng zawng a ropuiin a entawn tlak tak zet. Ramria police duty-te pawh an fakawmin an chhuanawm hle," a ti a, ram tana an inpekna ropui a tih thu a sawi.

MP C Lalrosanga hian CRPF duty-na hmun leh Saihapui-V khuaa Mizoram police duty-na hmunte a tlawh a; Vairengte Joint VC leh Vairengtea police duty-te hnenah Rs. 10,000 ve ve, Saihapui-V police duty-te hnenah Rs. 4,000 leh police-te duty camp-a hman tur silpauline panga a pe a ni.