Oil palm chin thar ngaihtuah a ni rih lo. Chíng mekte sorkarin a chhawmdawl dawn - Agriculture Minister
Agriculture minister C Lalrinsanga chuan, oil palm chìn thar chungchangah ngaihtuahna an hman rih loh thu a sawi a, "Oil palm chíng mek, eizawnna tak tak atana hmangte chu theihtawpin chhawmdawlna kan pe dawn," a ti.
Vanglaini palai zawhna chhangin Agriculture Minister chuan, Union Cabinet-in oil palm atan cheng vbc. 11,040 an pawm aṭangin Mizoramin a dawn zat tur hriat a la nih loh thu a sawi a, "Mipuiin an ngaihven a, ngaihdan an sawi nasa hle. Mipuiin an sawite hi dawn nuam kan ti," a ti a, ṭhahnemngai taka Mizoram leilung humhalh duhtute an ṭâwmpui thu a sawi.
C Lalrinsanga chuan, Union Cabinet-in oil palm chìnna atana a pawm chu hmuh a nih dan tur sawi theih a la nih loh thu leh Mizorama oil palm chìn darh leh darh loh chungchanga thutlukna siam theih a la nih loh thu a sawi a, "Sectoral allocation pawh a la awm lo. Expansion lam scheme a lo kal reng a, chìn darh nuai hi ṭha ka ti lem lo. Tuna chíng mekte leh an chìnna sa Bukvannei leh a chhehvela chìn belh duh an awmte chuan thu hran," a ti.
Oil pam chu sum lâk luhna atan bera hmang eng emaw zat an awm nia sawiin C Lalrinsanga chuan, "Oil palm chíng mek, eizawnna tak tak atana hmangte chu theihtawpin chhawmdawlna kan pe dawn. Eizawnna atana hmanga inbéngbel tawhte kan thlahthlam dawn lo," a ti a; oil palm chíngtute'n harsatna an tawh ber chu kawng a nih thu a sawi.
Agriculture Minister chuan, sorkar laipuiin oil palm atana sum a pawm chu a kal dan tur hriat la ni lo mah se, oil palm chíng mekte harsatna tawh sutkianna atana hmante an rilruah a awm tih a sawi a, "Kawng tihchangtlunna atan a theih chin chin hman a rem chuan rilruah a awm. Eng ang zawngin nge min pek dawn a hriat loh a, kawng atan hman theih pawh a lo ni kher lo mai thei," a ti.
Mizoram chu hmarchhakah oil palm chìn lama hmahruaitu a nih thu sawiin C Lalrinsanga chuan, "Kan hun laia tih a ni a, a ṭhatna leh ṭhat lohnate kan zir ve nasa hle. Expansion lam páwng sawi zuah zuah chi pawh a ni lo," a ti a; oil palm chíng darh turin hmathlir an neih rih loh thu a sawi.