Mizoram sorkarin infiamna lamah bung thar a kái, a ropui kan ti - MNF

MNF party chuan thuchhuah siamin, Tokyo Olympic 2020-a India hmeichhe hockey team-a tela semi final thleng thei Lalremsiami tana sorkar hna pek chu atan liau liaua buatsaih a nih avangin mi dang a dâl lo a, a tibuai lo tih an tarlang a, "Mizoram sorkarin infiamna lamah bung thar a kái a, a ropui kan ti," an ti.

MNF chuan, Lalrem­siami chu Mizoram sorkarin cheng nuai 25 pek turin a ruahman tih sawiin, Olympic ṭan hmaa cheng nuai 10 a lo pek tawh bâkah, cheng nuai 15 pek tur la awm chu nimina Vanapa Hall-a sorkarin Lalremsiami lawmna hun a buatsaihah chief minister Zoramthanga'n a hlan tih an sawi a; Kolasib-ah Soil & Water Conservation department ram ṭhinah in hmun pek a nih bakah, Sports department-ah hockey chief coach (group-A) hna a pe bawk tih an tarlang a ni.

Sports & Youth Services department-a hockey chief coach hna Lalremsiami hnena pek chu ama tan liau liaua siam (supernumerary post) a nih thu sawiin MNF chuan, "Tu promotion mah a tibuai lo a, mi dang a dâl lo. Amaha bet tlat, a zawm loh emaw, a tàwpsan emaw pawh ni se, a hna hi tàwp ve nghal tura ruahman a ni. Recruitment rules nei ve loa siam ni mah se, hun lo kal zel tura kaisang zel thei tur, 'Assured Carreer Progression Scheme' nena delhkilh thlap a ni," an ti.

MNF tarlan danin, thalkah (archery)-a India aiawha Olympics-a tel C Lalremsanga chu sorkar hna group-B post pek a ni a, boxer Zoramthanga chu sports promotion officer (group-A) hna pek a lo ni tawh a; Jenny R Lalremliani pawh Police-ah deputy superintendent of police (group-A) ah dah a ni tawh bawk.

Mizoram sorkar kal tawhah mi ṭha­hnemngaite'n infiam mite chawikanna leh hmasawnna tur sport policy siam se an tih ṭhin chu sorkarin a tipuitling tawh tih sawiin MNF chuan, "Mizoram sorkarin a ruahman a, sports policy ṭha tak kan nei ta a ni," an ti.