TRC-in an zirlai ti ṭhate an chawimawi
T Romana College chuan nimin khan Mizoram University hnuaia under graduate exam-a an college aṭanga ti ṭhate an chawimawi a; MJA president Zonunsanga Khiangte-in a hmanpui.
Kumina MZU hnuaia BA final result chhuakah T Romana College aṭangin candidate 348 awmin, exam zinga 96% an pass a; Aizawl khawpui chhunga Mizoram sorkar college zingah pass percentage sànna ber a ni. Kum 2020-ah chuan candidate 269 zingah 78% an pass thung.
Chawimawina inkhawma khuallian Zonunsanga Khiangte chuan, T Romana College result chu chhuanawm a tih thu sawiin, "Building leh hmunhmaah chuan college ropui ber a ni lo mai thei a, mahse, a chhunga awmte in ropui a, chu chu in thiamna hmangin puan chhuahin a awm a ni," a ti a; T Romana College chhuak chu an danglam bik tur a ni, tih rilru pu turin graduate tharte a chah.
Ṭhalai zingah hrehawm tawrh peihna leh teirei peihna a tlahniam tawh hlea a hriat thu sawiin MJA President chuan, TRC aṭanga zir chhuakte chu thawkrim bik turin a chah a; sorkar hnain ṭhalaite a daih vek tawh lo tih sawiin, "Enterprenuership lama kawng zau tak inhawng chho mekah thawkrim leh a ngaihna hriate tan chuan rei lo tê chhungin eizawnna ngêlnghet tak a ni chho thuai thei. Kuthnathawhnaah pawh a zir sang nge nge chuan ngaihtuahna an nei ṭha ṭhin a, kawnghmang an hre nge nge fo a ni," a ti.
Zonunsanga Khiangte chuan, Mizo ṭhalaite'n hriselna ngai pawimawh se a duh thu te, hrisel turin taksa sâwizawi a ngaih thu te, taksa a hrisel chuan rilru pawh a hrisel ṭhin thute a sawi a; zirlai bakah hriatna tizau thei lehkhabu, chanchinbu leh thawnthu bute chhiar tam turin zirlaite a chah bawk.
TRC principal Dr Jennifer Lalbiakdiki chuan, hripui léng laka inkaihhruaina avangin zirlai hlawhtlingte chawimawina ropui taka buatsaih a remchang lo chu pawi an tih thu a sawi a; an tih theih tâwk chu pawmsak turin zirlaite a ngen. Nimina chawimawina hunah hian kum 2020 leh 2021-a zirlai ti ṭha hnenah chawimawina hlan a ni.
T Romana College hi kum 1992-a din a ni a, Arts subject pariat zir theih niin, zirlai 1,380 an awm mek. National Assessment and Accreditation Council (NAAC) chuan grade 'B' a pe a, thawktu 53-in an enkawl mek a ni.