LADC-a MNF sorkar paihthlak a ni

Lai Autonomous District Council (LADC)-a MNF sorkar, chief execu­tive member (CEM) Mang­hmung Chinzah kaih­hruai chu nimin khan House-ah bûk a ni a, bûkna hi paltlang zo loin, sorkar paihthlak a ni.

LADC session neih mekah MNF member palite'n Manghmung Chinzah kaihhruai sorkar ding lai rin tâwk lohna motion an thehlut a; motion chu nimin chawhnu dar 2 aṭang khan chairman V Zirsanga kaihhruaina hnuaiah sawiho a ni a, chumi hnuah bán pharin bûk a ni.

Motion thláwptu (sorkar paih duhtu) lam­ah member 12-te'n bán pharin, sorkar ding lai ring tâwk lamah member 10-in bán an phar a; Congress MDC pakhat, South Lungpher bialtu C Lal­muanthanga erawh chuan bán a phar ve lo thung.

MNF MDC palite'n sorkar ding lai an rin tâwk lohna motion an put luhah hian, langtlang sorkar an beisei chu hmuh tur a awm lo tih an tarlang a, "Sorkar hnalak leh chanvo sem rualah member-te khai rual a ni lo," an ti.

LADC inthlanpui hnu­hnung ber, December 4, 2020-a neihah seat 25 awm aṭangin MNF-in seat 20 lain sorkar an siam thei a; independent aṭangin pathum leh BJP leh INC aṭangin pakhat ve ve thlan tlin a ni bawk. CEM paihthlak tâk Manghmunga Chinzah hi December 14, 2020 khan CEM atan lak luh a ni.