Aizawl district-a college-ah Drug awareness campaign neih rêl

Aizawl district bawrhsap Dr Lalhriatzuali Ralte hoin August 25, Nilaini khan Nasha Mukt Bharat Abhiyan Mizoram (Drug Free India Campaign Mizoram) hruaitute DC conference hall-ah an ṭhukhawm a; Aizawl district-a college hrang hrangah awareness campaign neih an rêl.

Ṭhutkhawma tarlan danin, Narcotics Control Bureau report leh Ministry of Social Justice & Empowerment-in India ram puma survey a neih aṭangin ruihhlo hman sual hluarna bik district 272 thlan a ni a, chung zingah chuan Aizawl, Champhai leh Kolasib district-te a tel.

Mizorama ruihhlo hluarna district pathumah ruihhlo chungchanga inzirtirna ngawrh zawka kalpui a nih theih nan Nasha Mukt Bharat Abhiyan (Drug Free India campaign) kalpui mek a ni a; Nasha Mukt Bharat Abhiyan-in a tum ber chu - ṭhalaite ruihhlo ti lo tura zirtir leh ṭanpui ngai an nih chuan ṭanpuina hmun hrilh leh hruai thlen a ni.

Nimina ṭhutkhawmah hian Police, Health department, School Education department, Legal Service Authority leh Social Welfare department hotu te, Central YMA leh pawl dang hruaitute an tel a ni.

Hmalakna tur an rêlte
- Aizawl district-a college hrang hrangah campaign neih
- Zirna-in bul hnaia ruihhlo leh vaihhlo aṭanga siam thilte danin a phal chin bâk zuar an awm lohna tura hmalak
- Sikul naupang leh sande sikul naupangte hnenah ruihhlo leh a kaihhnawih chungchang zirtirna tam zawk neihpui
- Damdawi ruih theih chi awlsam taka hralh chhuakte leh danin a phal chin bâk zuarte dap chhuak tura hmalak
- Kohhran leh khawtlang hruaitute nena thawhho a, ruihhlo leh a kaihhnawih chungchang inhrilhfiahna hun hman
- Aizawl District Committee member-te'n drug treatment service hrang hrangte tlawh kualin, ṭhalaite hnenah nasa lehzuala hmang ṭangkai tura sawihona neihpui