COVID-19: Mizoram dinhmun : Hripui vei 794 hmuh belh a ni

August 25, Nilaini khan Mizoramah Covid-19 vei mi 794 hmuh chhuah a ni. Nimin khan hripui vei dam tawh mi 354 chhuahtir an ni a, hripui vei thi pakhat a awm belh.

Covid-19 vei hmuh tharte chu mipa 370 leh hmeichhia 424 an ni a; ZMC laboratory-a hmuh chhuah 151, TrueNAT-PCR hmanga hmuh 44 leh Rapid Antigen Test hmanga hmuh 599 an ni.

Hripui vei hmuh thar 794-te chu symptom nei 441 leh nei lo 353 an ni a; tualchhunga kái 788 leh tun hnaia state pawn aṭanga rawn lut paruk niin, tualchhunga kái zingah kàina chin hriat loh mi 339 an awm.

IDSP record angin, Mizoramah Covid-19 vei 54,851 hmuh chhuah a ni tawh a, mipa 28,202 leh hmeichhia 26,649 an ni. Nimin tlai dar 5 thleng khan mi 47,921 (87.36%) chhuahtir an ni tawh a, mi 202 (0.37%) thi tawhin, enkawl mek mi 6,728 (11.81%) an awm. August 25, Nilainia sample endik dan chu - ZMC laboratory-ah Aizawl leh Lunglei district-a mi 1,250, TrueNAT hmangin district 11-ah 303 leh RAT hmangin district 11-ah 6,835 a ni a, a vaiin sample 8,388 a ni. Sample endik aṭanga hripui vei hmuh chhuah 794 chu 9.47% a ni a; ZMC-ah 12.08%, TrueNAT-ah 14.52% leh RAT-ah 8.76% a ni.

District tinah hripui vei hmuh belh a ni a; Aizawlah mi 428, Lungleiah 85, Kolasib-ah 84, Lawngtlaiah 71, Champhaiah 58, Mamitah 23, Siahaah 20, Hnahthialah 12, Serchhipah 10, Saitualah pahnih leh Khawzawlah mi pakhat hmuh chhuah a ni. Hripui vei hmuh chhuah mi 794-te chu Aizawla veng 63 leh khaw dang 58-a mite an ni a; Lunglei khawpuia veng 10, Lawngtlaia veng pariat, Kolasib-a veng pasarih leh Siahaa veng paruka mite an tel.

Hmuh chhuah thar zingah nausen kum khat tling lo 11 awmin, an zinga parukin symptom an nei a, thla khat tling lo pahnih an tel. A upa ber kum 88 mi pawh symptom nei a ni. August thlaa ni 25 chhungin Mizoramah Covid-19 vei mi 15,927 hmuh chhuah a ni tawh a, chawhrualin ni tin mi 637.08 hmuh chhuah an awm ang niin, tun hnaiah a pung leh hret hret tawh. Mizorama Covid-19 vei hmuh tawh zat 54,851 chu kum 2011 chhiarpui angin, Mizorama mi 1,000 zelah hripui vei mi 50 an awm ang a ni.

Nimin khan tlai dar 5 thlengin hripui laka fihlim tawh mi 354 chhuahtir an ni a; Aizawl district-ah mi 138, Kolasib district-ah 132, Mamit district-ah 39, Lawngtlai district-ah 19, Champhai district-ah pakua, Lunglei leh Serchhip district-ah paruk ve ve, Hnahthial district-ah pali leh Saitual district-ah pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 12,903 hmuh chhuah a ni tawh a, TrueNAT-PCR hmangin 3,166, RAT hmangin 38,738, FIA hmangin 43 leh Guwahati-ah pakhat hmuh chhuah a ni tawh.

IDSP tarlan danin, August 25, 2021 thlengin Mizoramah swab sample 8,19,334 endik a ni tawh a, chu'ng aṭanga Covid-19 vei hmuh tawh zat 54,851 chu 6.69% a ni. Hripui vei hmuh tawh zinga mi 50,543 chu Mizoram chhunga kái chhâwng an ni a, mi 4,308 chu Mizoram páwn aṭanga an rawn luh hnua hmuh chhuah an ni.