Mizoram State Law Commission-in Mizo kaihhnawih dante an sawiho

Mizoram State Law Commission chu an chairman Lala Khobung hoin nimin khan a pisaah an ṭhukhawm a; India danpui leh Mizoram kaihhnawih dan hrang hrang an sawihote chu Mizoram sorkarah thlen an rél.

India danpuiin Mizo­rama cheng Zo hnahthlakte a tarlan dan leh Eighth Schedule-ah Mizo ṭawng telh chungchang te, The Mizo Marriage, Divorce and Inheritance of Property Act, 2014 hman mekah siamṭhat leh ennawn ngai te, MHIP Gen. Hqrs. leh Central YMA aṭanga rawtna leh autonomous district council aṭanga thu lut te, CrPC Section 167-a magistrate-te thuneihna - chargesheet thehluh hmaa jail-a an dah theih hun chhung chungchangte sawiho a ni a; ngun zawka zir chian leh ni se, an ti.

Sorkara thlen tura tihte
1. The Constitution (Scheduled Tribes) Order, 1950 Schedule-a entry 10 of Part II - Assam, entry 17 of Part X - Manipur, entry 10 of Part XI - Meghalaya, entry 10 of Part XVII - Mizoram te-a ‘Any Mizo (Lushai) Tribe’ tihah hian bracket leh 'Lushai' chu paih a, ‘Any Mizo Tribe’ tia thlak.
2. The Constitution (Scheduled Tribes) Order, 1950 Part II - Assam-a ‘In the Autonomous Districts of Karbi Anglong and North Cachar Hills’ tih hi paih ni se.
3. The Constitution (Scheduled Tribes) Order, 1950 huam chhunga ‘Pawi’ leh ‘Lakher’ inziakte hi ‘Lai’ leh ‘Mara’ a thlak vat ni se.
4. The Constitution (Scheduled Tribes) Order, 1950 hnuaia Scheduled Tribes list, State leh UT-a ‘Any Mizo Tribe’ tih la tel ve loteah ‘Any Mizo Tribe’ hi telh vek ni se.
5. Constitution Article 344(1) leh 351 tlawhchhana siam Eighth Schedule-ah Mizo ṭawng (language) telh ve ni se.
6. Criminal Procedure (CrPC) Chapter IX huam chhunga a mawhphurhna (maintenance)-ah hian ‘Grand father and grand mother’ telh ni se.
7. Tenth Schedule to the Constitution of India (Provisions as to disqualification on grounds of defection) hi Mizorama autonomous district council-ahte hman ni se.