Champhai DC-in uluk zawka Duty turin task force-te a ngen

Champhai bawrhsap Maria CT Zuali chuan an district chhunga village task force (VTF)-te hnenah lehkha thawnin, an district-a Covid-19 léng zual zel avangin uluk zawka duty turin a ngen.

Maria CT Zuali chuan, hripuiin Champhai district a luhchilh mek tih tarlangin, "He hripui léng hi a darh zel lohna turin mi tinte fimkhur lehzual turin kan inchah a ni. Tun dinhmunah Health department lamin duhthusama inenkawlna hmun leh hmanrua ṭha an nei lo. Hri léng laka kan fimkhur loh a, inenkawl ngai kan pun zel chuan kan medical hmunhma leh hmanraw neihte'n min dâwl zo lo ang tih a hlauh­awm em em a ni," a ti.

Champhai district chu ramri dep a nih avangin fimkhur zual a ṭul thu tarlangin Bawrhsap chuan, "Myanmar aṭanga mihring leh bungrua rawn lut avangin hri hi awlsam taka darh mai thei reng a ni. Chuvangin, hri léng laka mipui kan him zel theih nan in huam chhung ṭheuhah uluk leh khauh zawka duty hna min lo thawhsak turin kan ngen a che," a ti a; dan bawhchhiate chunga action la zel turin VTF-te a ngen a ni.