KHAWTHLIR
FMGEW-in Rs. 70,61,600 thawh
Mizoram sorkar hnathawk pawl hrang hrang intèl khawmna, Federation of Mizoram Govt. Employees & Workers chuan Covid-19 vanga harsatna tâwkte puihna turin ni khat hlawh an thawh khawm Rs. 70,61,600 chu nimin khan Chief Minister's Relief Fund for Covid-19 ah an thawh. FMGEW hian June 17, 2021 khan CMRF for Covid-19 ah an ni khat hlawh thawh khawm Rs. 3,00,00,000 leh July 26, 2021 khan Rs. 2,00,00,000 an lo chhûng lut tawh a; nimina an chhûn luh leh nen a vaiin Rs. 5,70,71,600 an thawh tawh a ni.
Traffic point thar
Mission Vengthlang Local Council-in an veng dàwrkàwna traffic point thar an siam chu nimin khan traffic SP Rodingliana Chawngthu-in a hawng. Traffic point thar hi Traffic Police leh PWD remtihnaa siam a ni a, H Lalthanpuia Point tih a ni.
Online training
Human Resources Development Board, School Education, SCERT, Mizoram Information Technology Society (MITS), Mizoram Mathematics Society (MMS) leh Pachhunga University College-a Department of Mathematics-te chuan August 24-25 zan khan 'Educational Technology for Helping Teacher during the Covid-19 Pandemic’ tih hmangin online training an buatsaih a, zirtirtu 351 an tel.
MLA-in hripui vei
West Tuipui bialtu MLA Nihar Kanti Chakma chuan Covid-19 a vei tih nimin khan hmuh chhuah a ni tih sorkar thuchhuahin a tarlang. A nupui, a fanu leh an chenpui midang pakhat pawh Covid-19 positive an ni tih hmuh chhuah a ni bawk.
MJA President ruat
T Romana College-a Thingsiri Cultural Club chuan MJA General Headquarters President chu an club patron atan an ruat. Ruatna hi nimina zirlai ti ṭha chawimawina hun hman rualin MJA president Zonunsanga Khiangte hnenah an hlan a ni. TRC principal Dr Jennifer Lalbiakdiki chuan, an college leh MJA thawh dunna a ṭhat thu sawiin, MJA chu an college duhsaktu an nih thu a sawi. Thingsiri Cultural Club hi October 10, 2010-a din a ni.