Lunglei Municipal Council dinna tur Cabinet ngaihtuah turin peih tawh

Urban Development & Poverty Alleviation (UDPA) department chuan Lunglei Municipal Council (LMC) dinna atana ṭul leh pawimawhte chu Cabinet ngaihtuah turin an peih tawh.

UDPA department chuan LMC din rawtna Cabinet-ah an thehlut tawh a, chu chu April 6, 2021-a Cabinet ṭhutkhawma ngaihtuah tura tih a ni laiin, ṭhutkhawm hmain hnuhkîr a ni. UDPA hotute chuan, an rawtna siamah technical thila fel tâwk lo a awm tih an hriat chhuah avangin an hnûkkîr leh tih an sawi.

Hnuhkir a nih hnuah UDPA chuan LMC dinna atana ṭul leh pawimawha technical thila fel lo awmte chu siamṭhain, Cabinet-a ngaihtuah turin an peih leh tawh. LMC-ah hian ward 11 awm turin rawtna thehluh a ni dawn a, Cabinet meeting hmasa berah ngaihtuah a nih rin a ni.

February 15, 2021 khan Vanglaini palai zawhna chhangin, UDPA department enkawltu Tawnluia, deputy chief minister chuan, LMC siam turin sorkarin ruahmanna a nei niin a sawi a, "Cabinet-ah pek luh a ni ang," tiin a lo sawi tawh.

Dy. CM Tawnluia chuan, LMC din turin UDPA department-in ruahmanna an siam vek tawh thu sawiin, "Cabinet memorandum buatsaih a ni tawh. A boruak en chung zelin financial year tharah chuan kan ruahmanna hi Cabinet-ah kan pu lût ang a, an pawm ngei ka ring," a ti a; an election manifesto-ah 'Municipality a theih ang angin din chhoh zel a ni ang' tih a tel thu a sawi.

Deputy CM sawi angin, Cabinet meeting-ah hian April 6, 2021 khan LMC din tura rawtna thehluh a ni a, mahse, technical lamah fel lo a awm avangin ngaihtuah a ni ta lo a ni.