CM leh NEC Secretary an inkâwm

North Eastern Council (NEC) secretary K Moses Chalai chuan nimin zing khan chief minister Zoramthanga a pisaah a kâwm a, Mizorama NEC hnuaia hmalaknate an sawi dun. Chief secretary Lalnun­mawia Chuaungo nen Mizorama NEC sum hmanga hna thawh mek 26 an thlirho bawk.

Chief Minister leh NEC Secre­tary hian Mizoram leh India hmarchhaka economy tihhma­sawnna chungchang an sawi dûn a; K Moses Chalai chuan, Mizoram chu NEC project hrang hrangte a kalpui danah thawk ṭha a tih thu a sawi.

NEC secretary Moses Chalai hian chief secretary Lalnunmawia Chuaungo leh Mizoram sorkara official dangte nen Aijal Club-ah Mizorama NEC sum hmanga project 26 thawh mekte an thlirho a; khaihlak awm loa hna thawh zawh vat a nih theih nan hmalak ni se, an ti.

Lalnunmawia Chuaungo chuan, NEC hnuaia project thawh mekte chak leh awmze nei zawka kalpui a nih theih nan harsatna an tawh te, kalphung ṭha zawk nia an hriat te, ṭul leh pawimawh an tih apiang zalen taka sawi chhuak turin a chah a; NEC-in hmarchhak state hrang hrangah nasa takin hmasawnna hna a thawk a, Mizoram pawh NEC hmalakna chhawr ṭangkai berte zinga mi a nih thu a sawi.

Moses Chalai chuan, hmarchhak state-te chu ASEAN ramte nena inhnaih taka awm an nih avangin insumdawn tawnna kawngah hmabak êng tak an nei tih sawiin, "Heng ram aṭanga lak luh lam hawi ringawt ni loin, thawn chhuah kan nei ve tur a ni," a ti. A hun takah sum an dawn theihna turin NEC pisapuia thehluh tur ṭulte chu a hun taka thehlut ṭhin turin a chah.

Planning secretary Lalmal­sawma Pachuau tarlan danin, tun dinhmunah Mizorama NEC hnuaia project thawh mek 26 zinga 15 chu kumin sorkar kum chhungin thawh zawh hman beisei a ni.

NEC Secretary hi deputy secre­tary L Beimopha leh senior private secretary Mehir Dey ten an ṭawiawm a; nimin vek khan additional chief secretary JC Ramthanga a kâwm bawk a ni.