School Education leh DDK-in inremna ziak

School Education department leh Doordarshan Kendra, Aizawl-te chuan nimin khan School Education Secretary pisaah Doordarshan Kendra, Aizawla Educational TV Programme chhuah chhunzawm turin inremna thuthlung an ziak.

Memorandum of Agreement-ah hian School Education department aiawhin secretary Dr Lalzirmawia Chhangte leh DDK, Aizawl aiawhin head of programme Vanlaltlana Varte-in hming an ziak a ni.

Dr Lalzirmawia Chhangte chuan, DDK-a Educational TV Programme tihchhuah chu kum 2015-a ṭan a nih thu sawiin, tun thlenga chhunzawm zel a ni chu lawmawm a tih thu a sawi a, "Tunlaiah classroom teaching ringawt hi zirna atan a tâwk tawh lo a, tunlai technology hmanga zirtirna kalpui a pawimawh a ni," a ti.

Hripui léng avangin class pangngai a khaihlak chin tur hriat a ni lo tih sawiin Education Secretary chuan, "Academic session liam taah pawh tutorial class chu DDK leh cable TV-te nen hlawhtling takin kalpui a ni tawh a, naupangin mita an hmuh hmanga zirtirna hian an thiam theihna a tipung thei a ni," a ti a; TV programme chu mipui leh naupang zirtir nan a pawimawh thu a sawi.

DDK head of programme Vanlaltlana Varte chuan, DDK chu mipuite TV, sorkar ta a ni tih sawiin, "A din chhan ber pawh zirna a ni a, hmuhnawm leh en nuam ringawt hi a din chhan a ni lo," a ti a; sorkarin programme a neihte tichhuak a, mipui zirtir chu an hna a ni tih sawiin, "Educational TV Programme chhunzawmna atana thawh dunna kan ziak leh ta hi a lawmawm hle a ni," a ti.

School Education director James Lalrinchhana sawi danin, Educational TV Programme hi School Education leh SCERT department-te bakah MBSE-te nen ṭanghoa siam ṭhin a ni a; inremna thar ang chuan September 2021 aṭangin kum khat chhungin chawlhkar tin Ningani apiangin tlai dar 6:00 - 6:30 inkarah tihchhuah ṭhin a ni ang.