KHAWTHLIR

Thisen pe
KṬP, Dinthar Branch chuan nimin khan Aizawl Civil Hospital Blood Bank tan an kohhran hall-ah thisen unit 40 an pe a, petute mipa 36 leh hmeichhia pali an ni. Civil Hospital-ah hian nimin khan mimal a thlàwna thisen pe mi 23 an awm bawk.

Chawimawina hlàn
Mizoram Ex-Services League chuan nimin khan Treasury Square-a an pisaah Olympian Lalremsiami chawimawina an hlân. Chawimawina inkhawm hi Hon.Capt. Ngura Sailo-in a kaihruai a, Ex-Service League president Col. John Zama chuan, Lalremsiami chu chawimawi tlâk a nih avang leh a pa TH Thansanga (L) chu ex-servicemen a nih ve avanga chawimawina hlàn an nih thu a sawi.

Tanpuina hlân
Joseph Construction chuan nimin khan Covid-19 vei mek eng emaw zat awmna khua - Léngte leh Serzawl hnenah an harsatna phuhrûk nan ei tur chi hrang hrang leh pawisa an hlân. In 115 awmna leh mi 520 vel chenna Serzawl khuaah hripui vei mi 74 an awm mek a, Léngte-ah hripui vei mi 68 an awm mek bawk.

Thuthlung ziak
Urban Development & Poverty Alleviation department leh Kolasib DC pisa chuan nimin khan Kolasib-a IPR conference hall-ah 'Solid Waste Management and Operationalization of Solid Waste Management Centre, Kolasib’ tih hmangin zirhona an buatsaih. He hunah hian Kolasib-a UDPA officer leh KNOW company-te’n bawlhhlawh sawngbawlnaa an thawhhona turah inremsiamna thuthlung an ziak nghal a ni.

Zirlai tanpui
Sialkal Range Development Council (SRDC) chairman L Thangmawia, MLA kaihhruaiin nimin khan an huam chhunga zirlai thlan bikte hnenah chhawmdawlna pawisa an pe. SRDC hian UPSC civil service coaching, ALS Delhi-a kal mek Neihhlupui hnenah Rs. 1,00,000, NDA interview tura tling Muandingliana, Teikhang hnenah Rs. 1,02,000, x-ray technician zir tur Dingmuansanga, Kawlbem leh laboratory technician zirlai L Vungthanpuii, Mimbungte hnenah Rs. 36,000 ve ve an pe.