Covid-19 vangin mi 4 an thih belh : Niminah Bawngkawn South mi 3 an thi

28th August, 2021

Covid-19 vei enkawl mek zinga pakhat chu August 26, Ningani zan khan a thi a, nimin khan mi pathum an thi bawk. Nimina thite hi Bawngkawn South veng mi vek niin, ni khata khua/veng khata hripui vanga thi an tam ber ní a ni. Sorkar chhinchhiah angin, nimin tlai dar 5 thleng khan Mizoramah hripui vangin mi 206 an thi tawh.

Krishna Kumar Rai (74) h/o Jayanti Rai, Tuikual North chu August 26, Ningani zan dar 8:40 khan hripui vangin State Referral Hospital (ZMC)-ah a thi a, nimin chawhma lam khan an inah vui a ni. Covid-19 vei a ni tih August 15, 2021 khan hmuh chhuah a ni a, SRH-ah enkawl nghal a ni. KK Rai hi Gorkhali niin, in leh lo neia awm nghet a nih thu Tuikual North LTF Secretary chuan a sawi.

Nimin zing dar 2:30 khan Lalengmawia (76) h/o Zamani, Bawngkawn South chu hripui vangin SRH-ah a thi a, nimin chhun khan vui a ni. Covid-19 positive a ni tih July 30, 2021 khan hmuh chhuah a ni a, August 1-ah SRH-ah admit a nih thu sorkar thuchhuakin a tarlang.

Covid-19 vei enkawl lai LV Lalṭhakima (48) h/o Lalnunziri, Bawngkawn South chu nimin zing dar 6:30 khan SRH-ZMC-ah a thi a, nimin chhun dar 1 khan Bawngkawn South Presbyterian Kohhran Hall no. 2-ah vui a ni. Covid-19 vei a ni tih August 25 khan hmuh chhuah niin, August 26 khan SRH-ah enkawl ṭan a ni a; Covid-19 vaccine dose khatna la tawh a nih thu dawn a ni.

Nimin zing vêk dar 6:35 khan Chawngzika (83) h/o Hmingliani, Bawngkawn South chu Covid-19 vangin SRH-ZMC-ah a thi a, hripui vanga thi 206-na a ni. Covid-19 positive a ni tih August 2 khan hmuh chhuah a ni a, SRH-ah enkawl nghal a nih thu sorkar thuchhuakin a tarlang.

Bawngkawn South aṭanga thu dawn danin, Chawngzika hi Pneumonia nei sa a nih bakah, Covid-19 vaccine la kim tawh a ni a; kohhran upa a nih avangin nimin chawhnua Bawngkawn South Presbyterian Kohhran hall-a thlahna hun hman a nih hnuah tlai dar 4 khan biak-inah Aizawl Hmar Presbytery moderator Upa H Liansailova'n a vui. Bawngkawn South-ah hian darkar 4:10 chhungin Covid-19 vangin mi pathum an thi a ni.