COVID-19: Mizoram dinhmun : Hripui vei 905 hmuh belh a ni

August 26, Ningani khan Mizoramah swab sample 9,967 endik aṭangin Covid-19 vei mi 905 (9.08%) hmuh chhuah a ni a, August 10 hnua hmuh chhuah tam ber ní a ni. Nimin khan hripui vei dam tawh mi 169 chhuahtir an ni a; hripui vangin Ningani zanah mi pakhat leh niminah mi pathum an thi.

Covid-19 vei hmuh tharte chu mipa 447 leh hmeichhia 458 an ni a; ZMC laboratory-a hmuh chhuah 119, TrueNAT-PCR hmanga hmuh 71 leh RAT hmanga hmuh 715 an ni.

Hripui vei hmuh thar 905-te chu symptom nei 444 leh nei lo 461 an ni a; tualchhunga kái 901 leh tun hnaia state pawn aṭanga rawn lut pali niin, tual­chhunga kái zingah kàina chin hriat loh mi 459 an awm.

IDSP record angin, Mizoramah Covid-19 vei 55,756 hmuh chhuah a ni tawh a, mipa 28,649 leh hmeichhia 27,107 an ni. Nimin tlai dar 5 thleng khan mi 48,249 (86.54%) chhuahtir an ni tawh a, mi 206 (0.37%) thi tawhin, enkawl mek mi 7,301 (13.09%) an awm.

August 26, Ningania sample endik dan chu - ZMC laboratory-ah Aizawl leh Serchhip district-a mi 1,177, TrueNAT hmangin district 11-ah 374 leh RAT hmangin district 11-ah 8,416 a ni a, a vaiin sample 9,967 a ni. Sample endik aṭanga hripui vei hmuh chhuah 905 chu 9.08% a ni a; ZMC-ah 10.11%, TrueNAT-ah 18.98% leh RAT-ah 8.49% a ni.

District tinah hripui vei hmuh belh a ni a; Aizawlah mi 448, Lungleiah 105, Kolasib-ah 92, Lawngtlaiah 74, Mamitah 67, Champhaiah 51, Siahaah 35, Hnahthialah 12, Serchhipah pariat, Saitualah pasarih leh Khawzawlah paruk a ni. Hripui vei hmuh chhuah mi 905-te chu Aizawla veng 56 leh khaw dang 57-a mite an ni a; Lunglei leh Kolasib khawpuia veng 11 ve ve, Lawngtlaia veng 10 leh Champhaia veng pariata mite an tel.

Covid-19 vei hmuh chhuah thar zingah nausen kum khat tling lo 10 an tel a, an zingah symptom nei an awm nual. kum 80 chung lam mi 13 telin, an zinga pahnih chu kum 90 chung lam an ni a, a upa ber chu kum 95 mi a ni.

August thlaa ni 26 chhungin Mizoramah Covid-19 vei mi 16,832 hmuh chhuah a ni tawh a, chawhrualin ni tin mi 647.38 hmuh chhuah an awm ang niin, tun hnaiah a pung leh hret hret tawh. Mizorama Covid-19 vei hmuh tawh zat 55,756 chu kum 2011 chhiarpui angin, Mizorama mi 1,000 zelah hripui vei mi 51 an awm ang a ni.
Nimin khan tlai dar 5 thlengin hripui laka fihlim tawh mi 169 chhuahtir an ni a; Aizawl district-ah mi 34, Kolasib district-ah 55, Mamit district-ah 33, Lawngtlai district-ah 28, Serchhip district-ah 10, Champhai leh Hnahthial district-ah pali ve ve leh Saitual district-ah pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 13,022 hmuh chhuah a ni tawh a, TrueNAT-PCR hmangin 3,237, RAT hmangin 39,453, FIA hmangin 43 leh Guwahati-ah pakhat hmuh chhuah a ni tawh.

IDSP tarlan danin, August 26, 2021 thlengin Mizoramah swab sample 8,29,301 endik a ni tawh a, chu'ng aṭanga Covid-19 vei hmuh tawh zat 55,756 chu 6.72% a ni. Hripui vei hmuh tawh zinga mi 51,444 chu Mizoram chhunga kái chhâwng an ni a, mi 4,312 chu Mizoram páwn aṭanga an rawn luh hnua hmuh chhuah an ni.