Mizorama Covid-19 vanga thi zingah Vaccine la kim tawh mi 21 an awm

Health minister Dr R Lalthangliana hoin nimin khan Secretariat conference hall-ah sorkar leh páwl hrang hrang hruaitute'n Covid-19 leh a kaihhnawih thilte an thlirho. Covid-19 vanga Mizorama thi zingah Covid vaccine la lo mi 133, la kim tawh mi 21 leh first dose chiah la mi 30 an awm thu tarlan a ni.

ZMC hotute chuan, hripui vei an enkawlte an zirchiannaah, Mizorama Covid-19 vanga thi zinga 86.5% chu State Referral Hospital-a admit an nih thu an sawi a, "Mitthi 174 kan zir chian tawh zinga 125 chu Aizawl khawpui chhunga mi an ni a, mi dang 49 chu Aizawl páwn aṭanga admit an ni," an ti a; mahni inchîk reng tur leh symptom an neih chuan a rang thei ang bera swab test ti nghal turin mipui an chah.

ZMC hotute sawi danin, Covid-19 vanga SRH-ZMC-a thi an zir chian tawh zinga 50% chu symptom an neih veleha sample test nghal lo an ni a, kar hnih chuang symptom an neih hnua sample test chauhte pawh an awm. Mitthi an zir chian tawh zinga 65% chu kum 60 chung lam an ni.

Covid-19 vaccine la tawh zinga thi an awm nual tawh chungin, an tawnhriat aṭangin vaccine lakin awmzia a nei hle nia sawiin ZMC hotute chuan, "Mitthi zingah insawiselna nei lo mi 23 an awm tawh a, an zingah hian kum lama la ṭhalai tak takte pawh an awm. Vawi hnih positive nawn mi pakhat a thi tawh bawk," an ti; thi zingah natna benvawn nei - zunthlum vei, thisen sang, thawhah/asthma, cancer, TB, thin ṭha lo leh kal ṭha lo an tam thu an sawi.

June leh July thla chhungin SRH-ZMC-ah Covid-19 vei nau pai pali an thi a, August thla chhungin chawhrualin ni tin nau pai mi 14 an enkawl reng ang a ni. Damdawi leh inenkawlna hmanrua an nei ṭhaah an ngai a, damdawi awm loh vang emaw, ventilator chan loh vang emaw, oxygen hîp tur neih loh vanga thi an la awm lo.

Thawktu (volunteer) indaih lohna a nasat thu sorkarah an thlen tawh a, genomic sequencing tihna tur khawl US dollar 50,000 man a thlawnin USA aṭangin an dawng dawn hnai a ni.

Ṭhutkhawma tarlan danin, report thar berah Covid-19 vaccine first dose pek chhuah zat India ram pumah 49% a ni a, Mizoramah 85% niin, India ram state leh union territory zingah Mizoram chu a ti ṭha pariatna a ni. Vaccine full dose pek zatah Mizoram chu parukna (29%) a ni mek thung.

July 20, 2021 aṭanga swab sample endik rûnpui kalpui a nih hnuah August 26, Ningani thlengin khua/veng 75-ah tih a ni tawh a, sample endik aṭanga hripui vei hmuh chhuah (positivity rate) chu 2.93% a ni.

College leh university hawn chungchang leh inkaihhruaina hman mek chungchang sawiho a ni a, a ṭul angin SEC-in hma a la ang. Ṭhutkhawmah hian DMR minister Lalchamliana, Aizawl mayor Lalrinenga Sailo, chief secretary Lalnunmawia Chuaungo bakah, DMR leh Health department, ZMC leh police hotute, Aizawl DC, Aizawl City Local Council Association, MKHC, IMA, MOT leh Joint NGO Coordination Committee aiawhte an tel a ni.