Sericulture-a Mizoram hmasawnna tur Union Textile Minister hnenah thlen

Sericulture minister Dr K Beichhua chuan nimin khan New Delhi-ah Union Textile minister Piyush Goyal a kâwm a, Mizorama sericulture hmasawnna turte a sawipui.

Dr K Beichhua chuan, hmarchhak biala silk thar tihpunna tura sorkar laipuiin Northeast Region Textile Promotion Scheme (NERTPS) a kalpui chu March 2021-ah a tàwp avang leh Mizoram Sericulture department hnuaia scheme kalpuite pawh a tàwp tawh tih a sawi a; chuvang chuan state sorkarin Textile Ministry-a project a thehluhte pawh awmzia a awm tawh lo tih Union Minister hrilhin, project an siam tawhte chu Silk Samagra kaltlanga sanction sak turin a ngen.

Sericulture kalpuina atan Mizoram boruak leh leilung chu duhthusama ṭha a nih thu sawiin K Beichhua chuan, "India rama sericulture ṭhan zelna atan Mizoram hi investment lian tihna tham a tling," a ti.

Piyush Goyal chuan, state sorkarin project a lo siam tawhte chu an lo ngaihtuah tur thu leh thla thum hnua sanction a nih tur thu Dr Beichhua a hrilh.

Social Welfare minister ni bawk Dr K Beichhua chuan nimin vek khan Ministry of Tribal Affairs hnuaia National Education Society for Tribal Students (NESTS) commissioner Asit Gopal a kâwm a; EMRS la din lohna Mizorama RD block pakuaah EMRS din a nih theihna atan hma laksak turin a ngen a ni.