FOCUS hnuaia hmalakna sawiho

Khawzawl District Coordination Committee for Fostering Climate Resilient Upland Farming System in the North East (FOCUS) chu nimin khan Khawzawl DC CC Lalchhuangkima hoin DC conference hall-ah an ṭhukhawm a, hmalaknate an sawiho.

CC Lalchhuangkima chuan, FOCUS project chu kut hnathawktute leh mipui tana hamṭhatna tam tak pawchhuak thei a nih thu sawiin, "FOCUS hamṭhatna dawngtute hnena thlai chi pek duh tâwk mai loin, hlâwk leh ṭha zawka thlai an thar theih nan zirtir leh enpui zui a pawimawh," a ti a; thlai chingtute'n neitu nihna rilru pua an thawh theih nan mawhphurhna pe thiam turin thawktute a chah.

FOCUS project hnuaiah hian Khawzawl district chu circle pathumah ṭhen a ni a; - Kawlkulh circle hnuaiah khaw paruk, Khawhai circle-ah khaw 10 leh Khawzawl circle-ah khaw 16 a awm. Farmers interest group (FIG) 416 a awm a, chu'ng zinga 92 chuan FIG grant path an dawng tawh a ni.

Khawzawl district-a circle pathumah hian ram leilung leh boruak azirin thlai chi hrang hrang chìn ṭhin a ni a; tun dinhmunah loneitu chhungkaw 1,358 hnenah thingfanghma, balhla, lakhuihthei, RCM (rice), vaimim, bekang, alu, dragon fruit, slakelime leh leiṭhate sem a ni tawh.

Horticulture depar­tment nena thawhhona kaltlangin dragon fruit quintal 42 chuang an thar tawh a, tui leh lei luang ral tur vèn nan checkdam 52, tui khâwlna leh semna 20 leh chhungkaw 252 tan ram hectare 37.8-a zauah bench terracing tih a ni tawh a; tui khawlna leh semna paruk siam mek a ni bawk.