Teachers' Day hman dan tur rêl

Aizawl District Working Committee on National Foundation for Teachers’ Welfare chu an chairman Dr Lalhriatzuali Ralte, Aizawl DC kaihhruaiin nimin khan a pisaah School Education department hnuaia pawl hrang hrang hotute nen an ṭhukhawm a; Teachers' Day (Zirtirtu Ni) - September 5 hman dan tur an sawiho.

Ṭhutkhawmah hian, Covid-19 léng avangin Teachers' Day pualin talk show buatsaih ni se, an ti a; kum danga tih ṭhin aia uar zawkin zirtirtu chawimawina banner târ bakah, national leh state award dawng tawh Aizawl district-a zirtirtute chanchinbuah tihchhuah an rél bawk.

Kum 2020 chhunga Aizawl district-a National Foundation for Teachers’ Welfare Fund dinhmun tarlan a ni a; zirtirtu natna tuar ṭanpuina dawng mi 29 an awm tawh thu leh fund thawh khawm lamah nasa zawka ṭan lâk a ṭul thu an sawi. Bawrhsap hian NFTWF-ah hian Rs. 5,000 a pe nghal a ni.