Mizoram sorkar leh HPC(D) an inbia : Vawiinah inremna siam theih an beisei

Mizoram sorkar leh Hmar Peoples' Convention (Democrat) aiawhte chu nimin khan State Guest House, Aizawlah political level-in an inbia a, vawiin chawhnu dar 1-ah a hmun ngaiah inbiak chhunzawm tur niin, inremna siam hman ngei an inbeisei.

Inbiaknaa telte hi Mizoram sorkar aiawhte chu political adviser to CM Lalrinmawia Ralte, MLA leh Mizoram Law Commission chairman John Siamkunga, MLA ten an ho a; HPC(D) aiawhte chu working chairman LT Hmar-in a ho thung. Sorkar leh HPC(D) aiawhte hi mi 10 ve ve an ni.

Vanglaini palai zawhna chhangin Lalrin­mawia Ralte chuan, inbiakna chu tluang taka kalpui a nih thu a sawi a, "Kan sawihote hi official level-a an lo pawm tlân tawh a ni a, political level-a tlangkawm a ngaih avangin kan ṭhukhawm a ni ber mai. Harsatna a awm lo a, vawiin lamah inremna siam theih kan inbeisei a, tum pawh kan tum," a ti.

Nimina an sawiho ber chu, official level-a inbiaknaa an lo pawm tawh siamṭhat deuh ngaite siamṭhat a nih thu sawiin Lalrinmawia Ralte chuan, "Vawiin lamah a inremna tur tak tak chu sawiho a ni ang a, harsatna a awmin ka ring lo," a ti a; a lehlam lehlamin inhnialna em em an neih loh thu a sawi.

Lalrinmawia Ralte chuan, vawiin lamah inremna siam mah se, inremna thuthlung ziah hun tur sawi theih a nih loh thu a sawi a, "Inrem ringawt mah ila, thil tam tak tih zui ngai a la awm dawn. Thuthlung ziah hun tur chu anmahni nen kan sawiho leh a la ṭulin ka ring," a ti.

Vanglaini zawhna chhangin HPC(D) aiawha telte'n thupuangtu (spokeperson)-a an hman Lalṭhalien chuan, official level-a inremna tur an siam tawhte an thlirho thu a sawi a, "A wording siamṭhat ngai laite kan sawiho a ni. Inbiakna hi a positive hrih hle," a ti a; vawiinah inremna ṭha tak an neih theih ngei a beisei thu a sawi.

Lalṭhalien chuan, official level-a inremna siam tawh zing point pali tihdanglam rawtna an thlen thu sawiin, "Hmun eng emaw zatah mipui ngaihdan kan la a, chumi zûlzui chuan tihdanglam rawtnate kan thlen a ni. Lehlam lehlamin zanin inngaihtuahna hun kan nei ve ve a, inremna siam ngei kan duh ve ve a ni," a ti.

Lalṭhalien chuan, inremna thuthlung ziah hun tur chu sawi lâwk theih ni lo mah se, a rang thei ang bera inremna ziah chu lehlam lehlamin an duh ve ve thu a sawi bawk.