Pharmacist mawhphurhna a sâng tawh - Health Minister

Mizoram Government Pharmacist’ Association (MGPA) chuan nimin khan Tourist Lodge, Chaltlangah General Conference vawi 12-na an hmang a, Health minister Lal Thanzara’n a hawng. Minister chuan, khawvel hmasawn zelah mipui hriselna atan pharmacist-te mawhphurhna a sang tial tial tih a sawi.

Lal Thanzara chuan, damdawi chungchangah mipui an ṭhangharh mek zel tih sawiin, "Damdawi nihphung, a hnathawh leh a nghawng te, a ei dan tur dikte mipui leh damdawi hmangtute zirtir hi kan mawhphurhna pawimawh tak a ni a, chuvangin, damdawi hriatna kawngah hma kan sawna kan inchhiar zau a ṭul a ni,” a ti.

Mizoram sorkarin pharmacist pawimawhna hriain Mizoramah ngei pharmacy zirna, diploma leh bachelor degree bakah, master degree thleng zirna a awm theih nan hma a Iak thu sawiin Minister chuan, tunah chuan diploma zir theihna private institution leh RlPANS-ah master degree thleng zir theihna a awm tawh thu a sawi.

Health Minister chuan, damdawi pek chhuah leh damdawi hriat­na kawngah nurse leh doctor-te thu­râwn pe thei tura inzir reng turin pharmacist-te a chah a, "Pharmacist-te thiamna avangin Mizoram ram­hmul damdawi, thlaite zirchian mek zel a ni a. Ramhmul damdawi thlaite hi zirchian deuh deuh a ṭul," tiin, pharmacist-te chu ram páwna thawn chhuah theih tur khawpa hma Ia turin a fuih.

Mizoramin damdawi siam chhuahna a la neih Ioh avangin, damdawi siam sa zawrhte a him leh him Ioh te, dik taka zawrh leh lei a nih leh nih lohte chu pharmacist-te'n an ngaihven reng tur a nih thu sawiin Lal Thanzara chuan, "Mizorama damdawi zawrh tura Io lutte pawh a chakna damdawi káwma inziak ang a ni phak em tih enfiahna tur khawl sorkarin a ngaihtuah mek a ni," a ti.

MGPA General Confe­rence hi an president H Lalnuntluanga'n a kaihruai a, general secre­tary Lalbiakthanga'n an pawl hmalaknate a tarlang. Chawhnu lamah ro an rel a; vawiinah 'Use of Antibiotics' tih thupui an zir ang.