Aizawl leh Serchhip-ah Sentût leh thaksep Beihpui thlak dan tur sawiho

Nimin khan Aizawl leh Serchhipah sentût leh thaksep (measles & rubella) danna beihpui thlak dan tur sawiho a ni. Aizawlah chuan Aizawl District Task Force on Immunization-te chu DC A Muthamma hoin DC conference hall-ah an ṭhukhawm.

A Muthamma chuan, inpuahchahna ṭha tak nena Measles-Rubella Vaccination Campaign kalpui a pawimawh thu sawiin, "Campaign hlawhtlin nan department hrang hrang, a bik takin Social Welfare department leh School Education department-te'n thawhhona ṭha an neih a ngai a, campaign chungchang zirtirtute leh zirlaite'n an hriat chian a ṭul," a ti.

Meeting-ah hian campaign atana micro plan siam chungchang te, sikul hrang hranga zirlai vaccine la thei tur zat te, sorkar leh private school zirtirtu leh zirlaite campaign chungchanga hrilhhriat te, primary health centre (PHC) leh community health centre (CHC)-a thawkte workshop neih dante leh campaign kalpuinaa harsatna hrang hrangte sawiho a ni.

Serchhipah chuan Serchhip District Immunisation Task Force-te chu DC Sangchhin Chinzah hoin DC conference hall-ah an ṭhukhawm a; Bawrhsap chuan, vaccine chu a dawng/la tur naupangte'n kim taka an lak ngei theih nan khaw tina tlawmngai pawl leh kohhrante thawhpuiah a sáwm.

Measles-Rubella Vaccination hi Mizoramah April 16, 2018-ah kalpui ṭan tur a nina, thla khat vel kalpui a ni ang. Nausen thla 9 aṭanga tleirawl kum 15 inkar a huam dawn a, naupang 3,00,000 chuang vaccine la thei tura ruahmanna siam a ni.