Mizo hlang awmna CRPF din tum chungchangah thu thar a la awm lo

Mizoram ramri vengtu tur Mizo hlang awmna Central Reserve Police Force (CRPF) battalion pahnih din tum chungchangah Mizoram sorkarin sorkar laipui 

aṭangin thu thar dawn a la nei lo.

Vanglaini palai zawhna chhangin Home minister Lalchamliana chuan, Mizo hlang awmna CRPF din chungchangah hian sorkar laipui aṭangin thu thar an la dawn loh thu a sawi a, "Lushai Scout ti zawng deuhin kan dil a, mahse, Union Home minister Amit Shah khan 'Pawisa in nei lo si a CRPF zawngin kalpui ang' a ti a ni. Kan bawhzui reng a, tun hnaia Delhi-a Chief Minister kal pawh khan a bawhzui a ni," a ti.

Union Home minister Amit Shah hian October 4, 2019-a Mizorama a rawn kal ṭumin tlawmngai pawl hruaitute'n ramri áwng nasa vengtu tur security ṭha tak dah belh turin ngenna an lo thlen a;  state sum harsat avangin Central sumin CRPF battalion pakhat, Mizo hlang awmna din turin hma laksak a inhuam thu, Amit Shah chuan a sawi a ni.

November 29, 2019-a Mizorama political party leh tlawmngai pawl hruaitute nen New Delhi-a an inkawm ṭum pawhin Amit Shah chuan Mizoram bik tan international boundary veng turin CRPF/BSF battalion, Mizo hlang awmna siam a nih tur thu hi a sawi.