Mizoramah Covid-19 hmuh a la ni lo
Health minister Dr R Lalthangliana chuan nimin khan Coronavirus chungchangah thuthar thehdarhtute a pisaah a kâwm a; Mizoramah Covid-19 a luh lohna turin theihtawp an chhuah thu a sawi. Nimin thleng khan Mizoramah Covid-19 kai hmuh chhuah an la awm lo.
Theihtawp an chhuah thu sawiin Health Minister chuan, "Covid-19 a lêng tih kan hriat aṭangin hma kan la nghal. District level-ah task force din nghal a ni. Thawhlehni khan Central YMA, local council leh AMC hotute nen kan ṭhukhawm a, veng tinah local level task force din kan rel a, Aizawl páwn lamah pawh din a ni ang. Local level task force hian an huam chhungah a len loh nan hma an la dawn a ni," a ti.
Dr R Lalthangliana chuan, Lengpui Airport aṭanga Mizorama lut zawng zawngte chu ni 14 khung hran (home quarantine) an nih dawn thu sawiin, "Covid-19 hluarna hmun aṭanga lo thleng, awm hrang tura tih thu awih duh lote tih luih theihna tura dan duan chu Law department-in min pawmsak (vet) tawh. Theihtawp kan chhuah tak meuh a, kan infrastructure a chhe si a, mipuiin min khamkhawp lohna pawh a awm ang, ngaihdam ka dil a ni," a ti a; an tih theih ang chin chu an ti niin a sawi.
Health Minister sawi danin, Mizoramah Coronavirus a lên loh nan sorkar department hrang hrang, Assam Rifles, BSF, kohhran leh tlawmngai pawlte an thawkho ṭha a; Mizoramin international border km. 720-a thui a nei a, chu'ngahte chuan police, Assam Rifles, BSF leh tlawmngai pawlte an duty a ni. Covid-19 sample endikna khawl chungchangah R Lalthangliana chuan, "Duh duha lei ngawt theih a ni lo. State senior leh medical college senior zawk la nei lote pawh an awm. Pawisa neih vanga lei ngawt theih a ni lo," a ti a; Cabinet-in khawl lei a pass tawh thu a sawi. Sum chungchanga zawhna chhangin Health Minister chuan, "Kan Chief Minister-in theihtawpin min ngaihtuahpui a, awlsam zawka sum hmuh dan tur min ngaihtuahpui. Finance department kalphung pangngai ang chuan sum hmuh lâwk theih a ni ṭhin lo. CM ráwn chungin short cut-in sum hmuh dan tihfel a ni dawn," a ti.
Health Minister ṭawiawmtu chief secretary Lalnunmawia Chuaungo chuan, mipuite'n an hmuh lohah hmalakna tam tak an nei nia sawiin, "Ni tin mamawhah harsatna a awm lohna atan theihtawp chhuah a ni a, mamawh thil a lo lut reng. Tute'n emaw thuthang dik lo an thehdarh vanga lei chiam thleng lo se. Mipui tan rálkhelhna tur a awm lo," a ti a; sorkar thuchhuak a nih loh chuan awih lo turin mipui a chah.
Chief Secretary chuan, theihtawp chhuaha fimkhur a ṭul thu a sawi rualin, rálkhêl leh hlau záwnga awm lo tura mipui chahin, "Hlauh loh vanga mi dang tana hrasatna siam erawh tih chi a ni lo. Sum leh paiah pawh Covid-19 atan Chief Minister-in harsatna awm lo turin a ti a, sum a awm lo tih a awm lo. Mipui 10 aia tam punkhawmna siam lo turin kan inngen a ni," a ti.
Covid-19 enfiahna khawl chungchangah Chief Secretary chuan, "Tun dinhmunah chuan a pawimawh ber lo. Guwahati-ah kan thawn thei reng tho," tiin a sawi. Health principal director Dr F Lallianhlira sawi danin, sample pasarih Mizoram aṭangin Guwahati-ah thawn a ni tawh a, mi paruk result hmuh tawh niin, kai an awm lo.
Principal Director chuan, sample test turin duh duh thawn theih a ni lo a, Ministry of Health & Family Welfare-in endik theih chin (criteria) a siam thu sawiin, "Sample test theihte chu a hluarna rama kal insawiselna nei te, a vei damlo bul hnaia khawsate leh damlo enkawltu damdawi-ina thawk insawiselna neite an ni," a ti. Samples endikna laboratory neih dan sawifiahtu Zoram Medical College-a microbiologist Dr Gracy Laldinmawii chuan, laboratory chu Indian Council of Medical Research (ICMR) phalna loin din theih a nih lo tih sawiin, "ICMR hian a dahna tur an duh khirh hle. Din phalna min pek hnuah a in tur kan sa ang a, in sak zawh a nih hnuah an endik leh phawt ang a, ṭha an tih chuan a khawl leia dah thei a ni. Testing laboratory atan an pawm nghal lo a, test result endika an pawm hunah test theihnaah an puang chauh ang," a ti. Gracy Laldinmawii sawi danin, a tìrah chuan ICMR-in Coronavirus endik theihna atan laboratory a thlang tam lo a, case a tam hnuah eng emaw zat a puan belh a ni.
AN THUSAWITE :
Health Minister
• 'Mipuiin min kham khawp lohna a awm ang, ngaihdam ka dil e'
• 'Local level task force din a ni dawn'
• 'CM hmalaknain a awlsam zawngin sum pek chhuah a ni dawn'
Chief Secretary
• 'Rálkhel leh hlau zawnga awm loh tur'
• 'Ni tin mamawhah harsatna a awm loh nan theihtawp chhuah a ni'
• 'Tun dinhmunah sample test-na kan mamawh ber lo'
Health Principal Director
• 'Kan sample thawn result-ah positive a la awm lo'
Dr Gracy Laldinmawii
• 'Sample test-na laboratory duh duha din theih a ni lo'