Tuichang lei dawh chhunzawm turin hrilh

YMA Sub-headquarters, Ser­chhip hnuaia Vigilance & Monitoring Committee-te chuan March 6, Thawhlehni khan Keiṭum leh Khawlailung inkara Tuichâng lei dawh mek a hmun­ah an enfiah a; hna chawlh­san lailâwk chu chhunzawm thuai turin contractor an hrilh.

Serchhip sub-hqrs. YMA Media & Documentation Committee tarlan danin, Tuichang lei dawh hna hi Sadguru Engineers & Allied Services Pvt. Ltd., Guwahati-in an thawk. Agreement-a a inziah dan chuan, lei chu December 1, 2016-ah dawh ṭan niin, December 1, 2018-a zawh tura tih a ni a; estimate chu Rs. 7,51,08,989 niin, hna thawh tur zinga 5% vel an thawk tawh. Contractor hian Mizoram PWD-ah revised estimate an dil mek a, phalsak an la ni lo.

Contractor hian lei dawh hna hi February 17, 2018-ah an chawlh­san lailâwk a; chumi chung­changa YMA hruaitute zawhna chhangin Sadguru Engineers & Allied Services project manager Deepak Sharma chuan, mi pahnih/pathum inthurualin zan lamah ILP an endiksak a, pawisa an khawn ṭhin avang­in an hnathawkte chu hlauin an haw zel niin an sawi. Tual­chhung mi an rawih­in hna an thiam tawk ṭhin lo a, chuvang chuan an hna a tawp lailâwk niin an sawi bawk.

Hetih lai hian, PWD executive engineer Zothangsang Intote chuan, Sadguru Engineers & Allied Services-te chu an hna a muang hrim hrim a, hna thawktu (man power) an nei chhia tih sawiin, PWD-in an kar chiam pawhin awmzia a nei mawh hle niin a sawi thung.

Serchhip YMA hruai­tute chuan, Sadguru Engineers & Allied Services Project Manager-in hnathawh an chawlhsan chhan a sawi chu chhuanlam tlinga an ngaih loh thu sawiin, a rang thei ang bera hna thawh chhunzawm tur leh, Tuichang lei chu khawchhak leh khawthlang inkalpawhna kawngpui a nih avang­in lei dawh chu an vil reng dawn thu an hrilh.

ILP chungchangah Serchhip YMA hruaitute chuan, lei dawh hna thawhtu hnam dangte chu ILP fel tak siamsak zek turin contractor hotute an hrilh a; tualchhung mite aṭanga vauna leh sum khawn ṭhin an awm chuan YMA hruaitute hrilh vat zel turin an chah bawk. Project Manager Deepak Sharma pawhin March 12, 2018 hma ngeia hna an ṭan tur thu a sawi a ni.