Serchhip dist.-a bank-te hnathawh thlirlet

Serchhip District Consultative Committee (DCC) chu nimin khan DC Sang­chhin Chinzah hoin a pisaah an ṭhukhawm a; October-December, 2017 chhunga an district-a bank hrang hrangte hnathawh an thlir let.

Serchhip DC chuan, "Kan district chhunga bank hrang hrangte'n danin a phût anga hma an laknaah hmasawnna an neih theih dan tur kan inhrilh ṭhin. Amaherawhchu, target kan neihte vawiin thlengin duhthusamin kan tlin thei lo fo mai hi hriatthiam a har. Kuminah chuan nasa zawka kan beih a, kan target-te kan tlin ngei a ngai a ni," a ti.

Meeting-a tarlan danin, October-December, 2017 chhunga Credit Deposit Ratio (CD Ratio) chu a hma aiin 1.16%-in a sang zawk a, 47.32% a tling. CD Ration target 60% erawh an la pha lo. CD Ratio hi UBI-in an ti ṭha ber a, 78.86% a tling a, SBI-in 36.90% tlinin an tichhe ber thung.

Bank zawng zawngte deposit hmuh zat chu cheng nuai 23349.80 a ni a, advance an pek chhuah zat chu cheng nuai 11050.07 a ni. Annual Credit Plan hnuaia priority sector-ah 50.70% tlinin non-priority ah 59.25% an tlin a, priority hnuaiah hian agriculture lam hmasawn nan loan cheng nuai 1200 pe chhuak tura beisei an nih laiin, nuai 509.15 pek chhuah a ni. Industry-ah cheng nuai 600 beisei a nih laiin, nuai 375.37 chiah pek chhuah a ni bawk.