Congress an tlahniam zel - MNF

MNF party chuan thuchhuah siam­in, India ramah Congress party an tlahniam zel tih an tarlang a, "India ram state 29-ah Punjab, Karnataka leh Mizoramah chauh Congress an sorkar tawh a ni," an ti.

MNF chuan, kum 2014-a Lok Sabha inthlanah rorel lai Congress chuan MP 543 awmah 44 chauh an nei tih sawiin, "An artelukâwn lo chauh a, opposition party pawh an tling zo lo a ni," an ti a; chumi hnua India ram state hrang hranga inthlan apiangah Congress party an tla zel niin an sawi.

Tun hnaia India hmarchhak state pathumah inthlan a ni a, Nagaland-ah Congress-in MLA pakhat pawh an nei lo a, Congress rorel mekna Meghalaya-ah pawh MLA 21 nei mah se, sorkarna an siam zo lo a, party dangin sorkarna an siam tih MNF-te chuan an tarlang a; Manipur-ah pawh Congress an sorkar zo tawh lo tih an sawi bawk.

MNF party chuan, India ram mipui­in Congress party-ah rinna an nghat ngam tawh lo a, sorkarna siam turin thurualpui tlakah party dangin an ngai tawh lo nia sawiin, "Congress hian mipui rethei taka siam a, an retheihna denchhena an vote chhuhsak an chìn ṭhin ang ramhlui zia kha mipui­in an hnâwl tawh tih a entir," an ti.

State hrang hrangah mipuiin Congress party an hnâwl mek zel angin Mizoram mipuite pawh ṭhangharh ve tawh tura an duh thu MNF chuan an tarlang.