Bairabi-a chawlhbûk sak tum MZP-te Assam Police-te nen an innawr buai
MZP chuan nimin khan Bairabi Zophai hmunah Zofate Chawlhbûk sak an tum a, Assam Police lamin sak an phal loh avangin an sa thei lo a, ṭum hnih an innawr buai. MZP hruaitute chuan, Assam leh Mizoram sorkarin inremna an siam a nih loh chuan chawlhbûk an sak theih hma chu Zophaiah awm an tum thu an sawi.
MZP Gen. Hqrs. hruaitu ṭhenkhat leh Bairabi MZP hruaitute chuan nimin zing khan Zophaiah chawlhbûk a sak theih dawn leh dawn loh an thlithlai a, police pali vel chiah an awm avangin sak theih an inbeisei avangin chawlhbûk sakna tur hmanruate Bairabi aṭangin an thiar khawm a ni.
Bungrua nena Zophai an thlen leh chuan Magistrate hoin Assam Police 100 chuang an lo awm a, bungrua motor aṭanga an lak thlak ṭan hnuah MZP-te hi Assam Police-te chuan an lo dang. Ṭum eng emaw zat an innawr buai hnuah an inṭha-ṭhen a, chawlhbûk sakna tur hmunah Assam Police-te awmin, MZP-te chu a piah deuhah an awm thung.
Chawhma dar 11:45 vela Aizawl leh hmun dang aṭanga MZP member-te an kalkhawm hnuah chawlhbûk sakna tur bungruate chu lak thlak leh an tum a, mahse, Assam Police lamin an phal lo.
Hun eng emaw chen an innawr buai leh a, Assam Police lamin MZP member-te chu tiang hmangin an hnawt darh a, mi eng emaw zat an hliam. Chumi hnuah MZP member-te chu a piah deuhah an inkulh leh a ni.
MZP-te leh Assam Police-te innawrnaah hian hliam an awm nual a; hliam zingah a hmuna kal ve Aizawl leh Kolasib-a chanchinbumite leh Bairabi mite pawh an tel a, hliam na lutuk erawh an awm lo.
Buaina thlenna hmunah hian Mizoram lam aṭangin Magistrate leh police kal an awm lo a, chawhnu dar 1 velah 1st. IR Battalion aṭangin police eng emaw zat chu Mualvum aṭangin Bairabi-ah kal.
Vanglaini palai chhangin Kolasib aṭanga Magistrate kalte chuan, thil ṭha lo zawk a thlen an hlauh vanga Zophaiah kal lo an nih thu an sawi a, "Kan kal chuan MZP lam an pâwr sauh kan hlau a, thil ṭha lo zawk a thleng palh thei a ni," an ti.
Assam Magistrate-te chuan Vanglaini palai zawhna chhangin, buaina thlen chu an duh bik loh thu an sawi a, "State pahnih sorkarte inbiain, inremna siam se kan duh ber a ni," an ti a; state pahnih inbiaknaaah chawlhbûk sak remtih a nih chuan an dan theih a nih loh thu an sawi.
MZP president L Ramdinliana Renthlei chuan, Mizoram leh Assam sorkarin inremna an siam hma chuan Zophaiah awm an tum thu a sawi a, "Eng chen pawh ni rawh se, chawlhbûk sa turin kan feh chhuak tawh a, sa lo chuan haw kan tum lo," a ti.
Zophaiah hian MZP member leh Bilkhawthlir khaw mi mi eng emaw zat he thu ziah lai thleng hian an awm a, Assam Police lam pawh an la awm a ni.
L Ramdinliana chu, Assam Magistrate-te'n Assam sorkarin inbiak an duh thu Mizoram Chief Secretary hnenah March 7, Nilaini khan an thawn thu an hrilh tih a sawi a, "Mizoram sorkar lamin engtin mah an chhang lêt lo a, hei hi Assam sorkar lam thinrim chhan pakhat pawh a ni," a ti.
Assam sorkarin ram chhan tumin theihtawp an chhuah thu sawiin MZP President chuan, "Assam sorkar chuan a ram chhanna atan a police-te a hman laiin, Mizoram sorkarin police pakhat pawh a rawn tír lo hi a mak kan tiin, ná kan ti hle," a ti a; Assam sorkar chuan ram chhan tumah ke a pên laiin, Mizoramah chuan NGO-te ram chhan tura an pên chhuah thu a sawi.