MJA-in Assam Police thil tih an dem

Mizoram Journa­lists' Association (MJA) chuan thuchhuah siam­in, Bairabi-a chawlh­buk sak tumtu MZP-te thil tih tur a hmuna enfiah tura nimina kal Mizoram chanchin­bumite Assam Police-te'n kut an thlak chu an dem thu an tarlang.

MJA General Head­quar­ters thuchhuah chuan, MZP-in Baira­bi Zophaia Zofate Chawlh­buk sak leh an tum chungchangah thil awm dan a hmuna en thlithlai turin Aizawl leh Kolasib aṭangin chanchinbute an kal tih tarlangin, "Mizoram journalist-te thisen chhuak hial khawpa Assam Police-te'n kut an thlak leh an bungruate an tichhia hi MJA chuan demawm a ti tak zet a ni," a ti.

MJA chuan, Bairabi-a kal journalist-te hian an nihna tichiangtu identity card (ID) an entir chung pawhin Assam Police-te'n engah mah ngai loin kut an thlak nia sawiin, "Press sticker inbel hmu reng chunga journalist-te lirthei an nghaisa hi chan­chinbumite zalenna nghai­sakna dik tak a nih avangin MJA chuan thinrimthlak a ti hle a ni," an ti a; Assam Police kut tuar Mizoram journalist-te leh an bungraw chhiate avangin a ṭul anga zangnadawmna pe turin Assam sorkar a phût a ni.

MJA tarlan danin, MZP-in Bairabi Zo­phaia chawlhbûk sak hnatlang an neih lehnaa thil awm dan a hmuna en tur hian Aizawl aṭangin MJA member pathum leh Kolasib aṭangin MJA member pathum an kal a, MJA member paruk zinga pathumin Assam Police-te kut an tuar a ni.

MJA chuan, "He thilthleng hi MJA chuan ngawihbopui mai a tum lo a, a en zui zel dawn a ni," a ti.