KHAWTHLIR

Thisen pe
Serchhip College NSS chuan nimin khan an college-ah blood donation cam an huaihawt a, zirlai mipa 51 leh hmeichhia 30-te'n Serchhip District Hospital tan thisen unit 81 an pe.

Fire hydrant Dîpdâl loh tur
Traffic SP chuan thupek chhuahin, Aizawl khawpui hmun hrang hranga fire hydrant dahna bul hnaiah fire hydrant dîpdâl theiin lirthei leh thil dang/bungrua dah phal a ni lo tih a tarlang a, "Thupek pawisa loa lirthei leh thil dang/bungrua dah luite chu dan anga hrem an ni ang," a ti. Aizawlah hian kângmei a chhuah palha kâng ṭhelhnaa hman tur tui lakna atan hmun hrang hrangah fire hydrant dah a ni.

NEDP Tour
IPR department chuan NEDP bultumin Mamit area huam chhunga MUP member-te tan NEDP Tour an buatsaih. MUP member-te tana NEDP Tour-ah hian Mamita IPRO Paul Rokima hoin MUP member mi 19 an tel a; March 7, Nilaini khan Tuirial Hydel Project an tlawh. Serlui-B Hydel Project leh Bukvanneia Oil Palm Mill an tlawh nghal bawk.

World Kidney Day
Mizoram Kidney Patient Association chuan, nimin khan Aizawl Civil Hospital (ACH)-ah World Kidney Day an hmang. Day hmanna hi Dr Lalrinsanga Khiangte-in a kaihruai a, ACH medical superintendent Dr KL Remsanga chuan, kal natna nei lo tura inven a ṭul hle thu leh, doctor-te chawh ni loa mahni thua antibiotic leh damdawi dang duh hun huna ei mai mai loh a pawimawh thu a sawi. Dr PC Lalawmpuia'n thupui 'Kal leh hmeichhiate hriselna' thu a sawi bawk.

Womens' Day
Nimin khan International Womens' Day a ni a, MHIP Gen.Hqrs. buatsaihin Lal Thanhawla Auditorium-ah hman niin, MHIP patron Lalriliani'n a hmanpui. Kumina International Womens' Day thupui chu 'Press for Progress' tih a ni a, MHIP adviser V Vanlalruati, SCERT lecturer-in thupui a sawi.