Indo-Israel Centre of Excellence hawn a ni

Indo-Israel Project under Mission for Integrated Development of Horticulture (MIDH) kaltlanga, Haulawng leh Mualṭhuam North inkara buatsaih, Indo-Israel Centre of Excellence for Fruits chu nimin khan chief minister Lal Thanhawla leh Israel ambassador to India Daniel Carmon ten an hawng.

CM Lal Thanhawla chuan, Israel sorkar nena kut hnathawkte hmasawnna tura thawhho a ni chu a lawmawm a tih thu sawiin, "Haulawng leh Mualṭhuam North khawtlang mipuite'n phal taka ram an pek avangin hmasawnna ruhrel lian tham tak, Mizoram pumina a chhawr theih tur kan neih theih phah a ni," a ti.

Chief Minister chuan, New Economic Development Policy (NEDP) chu hmasawnna daih rei zawk (sustainable development) Mizoramin a neih theihna tur policy a nih thu sawiin, "NEDP hi ṭang ṭanpuina tur a ni a, mahni kêa dinchhuah tum tak takte chu sorkarin dâwm kângin, an mamawhte a hai chhuahpui zel dawn a ni," a ti.

Israel ambassador to India Daniel Carmon chuan, Indo-Israel Centre of Excellence for Fruits chu a hlawhtlin ngei theihna turin Mizoram sorkar leh mipuite duhsakna a hlan.

Inkhawm kaihruaitu Horticulture minister PC Lalthanliana pawhin thu sawiin, Centre of Excellence hlawh-tlinna turin CM Lal Thanhawla'n phûr taka bul a ṭanpui avangin a chungah an lawmthu a sawi.

Indo-Israel Centre of Excellence for Fruits hmun tur hi Hau­lawng V/C leh Mualṭhuam North V/C-ten Horticulture department hnenah an pe a; Indo-Israel Agriculture Project (IIAP) hmangin Mission for Integrated Development of Horticulture Scheme kal­tlanga thawh niin, India hmarchhak biaka a hmasa ber a ni a, cheng nuai 900 sênga din a ni. Kum 2015-ah hna thawh ṭan a ni a, a hmun zau zawng chu hectare 10.20 a ni.