NLUP Fair-cum-Exhibition buatsaih

Nimin khan Siaha DC pisa tualah NLUP Fair-cum-Exhibition buatsaih a ni a, Assembly speaker Hiphei-a'n a hawng. Mara Autonomous District Council (MADC)-a chief executive member (CEM) N Zakhai-a'n a hmanpui bawk.

Fair-cum-Exhibition hawnna inkhawmah Hiphei chuan, sorkarin mirethei leh harsa zawkte hma a ngai a, an dinchhuah theih nan ngaituahna tam taka a sên thu leh NLUP duan chhuah a nih thu a sawi a, "Sorkarin cheng nuai khat a pek lai hian pek tel theih loh thil pathum a nei a, chungte chu - rinawmna, taimakna leh mahni inthunun theihnate hi a ni," a ti.

NLUP Fair-cum-Exhibition-ah hian NLUP line department tinin an hmalakna hrang hrang tarlanna photo exhibition an nei a, NLUP dawngtute'n an thil thar/siam chhuahte an pho chhuak bawk.

Fair-cum-Exhibition hawnna inkhawm­ah hian Hiphei chuan Horticulture department hnuaiah NLUP third phase leh fourth phase-a ṭanpuina dawng turte hnenah Rs. 36,22,086 a sem nghal a ni.